«Тожикистон ёки Ўзбекистондаги ҳарбий авиациямиз қайтарилиши керак. Биз уларнинг хорижда қолиши ёки бу мамлакатларнинг авиациямиздан фойдаланишига йўл қўймаймиз», деди Афғонистон мудофаа вазири вазифасини бажарувчи мавлавий Муҳаммад Ёқуб. Бу ҳақда TOLOnews хабар бермоқда.
У ҳарбий авиацияни қайтармаган мамлакатлар оқибатларга дуч келиши ҳақида огоҳлантирди, дейилади хабарда.
Қайд этилишича, собиқ ҳукумат ағдарилганидан сўнг 40дан ортиқ вертолёт Ўзбекистон ва Тожикистонга чиқиб кетган.
TOLOnews каналининг маълумотларига кўра, Афғонистон ҳукумати 164та ҳарбий самолёт ва вертолётга эга бўлган, ҳозирда эса уларнинг 81таси Афғонистон ихтиёрида. Қолганлари эса Афғонистондан олиб чиқиб кетилган.
