Qozog‘istonda ichida o‘zbekistonliklar bo‘lgan avtobus YTHga uchradi

Jahon 13:49 / 28.12.2021 17220

Qozog‘istonning Olmaota viloyatida o‘zbekistonliklar bilan to‘la avtobus Mercedes-Benz E-Class rusumli avtomashina bilan to‘qnashib, yengil mashina ustiga ag‘darilgan. Zakon.kz xabariga ko‘ra, hodisa Olmaota-Bishkek avtomobil yo‘lining 105 kilometrida sodir bo‘lgan. Hodisa oqibatida uch kishi halok bo‘lgan va yana uch kishi jarohat olgan holda shifoxonaga yotqizilgan.

Baxsiz hodisaga yo‘llar muz bilan qoplangani sabab sifatida ko‘rsatilgan. Mercedes sharqiy yo‘nalishda Olmaota tomonga, avtobus esa g‘arbiy yo‘nalish bo‘ylab harakatlanayotgan bo‘lgan.

Foto: Zakon.kz

Mercedes-Benz haydovchisi rul boshqaruvini yo‘qotib, qarama-qarshi tomondagi yo‘lga chiqib ketishi oqibatida avtobus bilan to‘qnashgan. Oqibatda avtomobil yo‘l chetiga chiqib ketgan, avtobus esa uning ustiga yiqilgan.

Guvohlarning so‘zlariga ko‘ra, avtobus O‘zbekiston fuqarolari bilan to‘la bo‘lgan, Mercedes’da esa olti kishi bo‘lgan.

Vafot etganlarning barchasi Mercedes yo‘lovchilari bo‘lgan. Jarohatlangan to‘rt kishidan ikki nafari haydovchilar. Avtobus haydovchisi jiddiy jabrlanmagan va tibbiy yordam ko‘rsatilgach, uyiga ketgan. Mercedes haydovchisi o‘ziga kelgan, qolgan ikki nafar yo‘lovchi og‘ir ahvolda qolmoqda.

Avtobus yo‘lovchilariga jiddiy shikast yetmagan va ular boshqa transport vositasi yetib kelgunga qadar, havo juda sovuq bo‘lgani sabab gulxan yoqib tashqarida isinishgan.

Voqea Olmaota viloyati tergovchilari tomonidan o‘rganilmoqda, ekspertiza o‘tkazilishi belgilangan.

«Yengil avtomobilda olti kishi bo‘lgan: ulardan uch nafari voqea joyida vafot etgan, yana uch nafari turli tan jarohatlari bilan kasalxonaga yotqizilgan. YTHda avtobus yo‘lovchilari jabrlanmagan», deyilgan Olmaota viloyati YTH matbuot xizmati xabarida.

Ko‘proq yangiliklar: