Қозоғистоннинг Олмаота вилоятида ўзбекистонликлар билан тўла автобус Mercedes-Benz E-Class русумли автомашина билан тўқнашиб, енгил машина устига ағдарилган. Zakon.kz хабарига кўра, ҳодиса Олмаота-Бишкек автомобил йўлининг 105 километрида содир бўлган. Ҳодиса оқибатида уч киши ҳалок бўлган ва яна уч киши жароҳат олган ҳолда шифохонага ётқизилган.

Бахтсиз ҳодисага йўллар муз билан қоплангани сабаб сифатида кўрсатилган. Mercedes шарқий йўналишда Олмаота томонга, автобус эса ғарбий йўналиш бўйлаб ҳаракатланаётган бўлган.

Mercedes-Benz ҳайдовчиси руль бошқарувини йўқотиб, қарама-қарши томондаги йўлга чиқиб кетиши оқибатида автобус билан тўқнашган. Оқибатда автомобил йўл четига чиқиб кетган, автобус эса унинг устига йиқилган.

Гувоҳларнинг сўзларига кўра, автобус Ўзбекистон фуқаролари билан тўла бўлган, Mercedes’да эса олти киши бўлган.

Вафот этганларнинг барчаси Mercedes йўловчилари бўлган. Жароҳатланган тўрт кишидан икки нафари ҳайдовчилар. Автобус ҳайдовчиси жиддий жабрланмаган ва тиббий ёрдам кўрсатилгач, уйига кетган. Mercedes ҳайдовчиси ўзига келган, қолган икки нафар йўловчи оғир аҳволда қолмоқда.

Автобус йўловчиларига жиддий шикаст етмаган ва улар бошқа транспорт воситаси етиб келгунга қадар, ҳаво жуда совуқ бўлгани сабаб гулхан ёқиб ташқарида исинишган.

Воқеа Олмаота вилояти терговчилари томонидан ўрганилмоқда, экспертиза ўтказилиши белгиланган.

«Енгил автомобилда олти киши бўлган: улардан уч нафари воқеа жойида вафот этган, яна уч нафари турли тан жароҳатлари билан касалхонага ётқизилган. ЙТҲда автобус йўловчилари жабрланмаган», дейилган Олмаота вилояти ЙТҲ матбуот хизмати хабарида.