Toyota Motor Corp президенти Акио Тойода компания тақдимотида экологик софроқ автотранспортни ривожлантириш ва атроф-муҳитга чиқариладиган чиқиндилар ҳажмини қисқартириш бўйича режани тақдим этди. Бу режанинг асосий йўналишлари электр приводда ҳаракатланувчи гибрид ва тўлиқ электрлашган янги автомобилларни ишлаб чиқиш ва оммавий равишда ишлаб чиқаришдан иборат.

“Авваллари мен тўлиқ электрлашган автомобиллар ишлаб чиқарилишига унча қизиқиш билдирмаганман. Бироқ ҳозирда бунинг акси”, деб тан олган компания раҳбари.  

Компанияда таъкидланишича, бу мақсадга эришиш учун 70 млрд доллар сармоя қилинади. Бу сумманинг ярмини 2022 йилдан 2035 йилгача ажратиш режалаштирилган.    

Бунинг натижасида Toyota 2030 йилга келиб электромобиллари савдоси йилига 3,5 млн машинани ташкил қилишига умид қилмоқда. Бу вақтгача компания мижозларга Toyota ва Lexus брендлари остида 30 та моделдаги электромобилларни таклиф қилишни режалаштирмоқда. Электромобиллар седан, йўлтанламас, ихчам автомобиллар, тижорат транспорт воситалари сегментларида ишлаб чиқарилади.

Тақдимот давомида компания келгусида ишлаб чиқаришни режалаштираётган 16 та электромобил концептини намойиш қилган.

Айни вақтда компаниянинг моделлар қаторида бор-йўғи бир дона серияли ишлаб чиқарилувчи электр модел - bZ4X кроссовери мавжуд.