Тоғли Бадахшонда «омончилар» бир кишини ўлдириб қўйди. Хоруғ, Москва ва Лондонда одамлар митингга чиқди

Жаҳон 19:42 / 26.11.2021 24890

25 ноябрь куни Тожикистоннинг Тоғли Бадахшон мухтор вилоятидаги Хоруғ шаҳри марказида одамлар тўпланиб, ҳуқуқни муҳофаза қилувчи орган ходимларининг баъзилари жавобгарликка тортилишини талаб қилди. Уларнинг фикрича, «ОМОН» вакиллари 30 ёшли йигитни отиб ўлдирган.

Ўша куни 1992 йилда туғилган, хоруғлик Гулбиддин Зиёбеков ҳалок бўлган. У ўзини олиб кетиш учун келган «омончилар»га қаршилик қилган. Орада юзага келган тўқнашувда ўт очилган. Икки киши яраланган, Гулбиддин Зиёбеков ҳалок бўлган. Йигитнинг яқинлари Хоруғ шаҳри марказида йиғилиб, уни ўлдирган ҳуқуқни муҳофаза қилиш органи ходимлари жазоланишини талаб қилган. Норозилик митингига ҳалок бўлган йигитнинг жасадини ҳам олиб боришган.

Митинг тўқнашувга айланиб, одамлар ҳуқуқни муҳофаза қилувчи орган ходимлари билан жанжаллашиб кетган. Мамлакат телевидениесида айтилишича, 5 нафар ходим яраланган.

«Бир гуруҳ ёшлар Хоруғ шаҳридаги Тоғли Бадахшон автоном вилояти ҳокимият биносига ҳужум амалга ошириш орқали жамоат тартибини бузган. Улар ҳуқуқни муҳофаза қилувчи орган ходимларининг қонуний талабларини бажармай, ўточар қурол, тош ва бошқа жисмлар билан ҳокимият биносига, уни қўриқлаётган ходимларга ҳужум қилган», дея «Бадахшон» телеканали эфирида ўқиб эшиттирилган баёнотни келтирмоқда «Азия-Плюс» нашри.

«Азия-Плюс» мухбири билан суҳбатда роштқалъаликлар норозилик намойишида қатнашган икки киши ҳалок бўлгани ҳақида айтишган. Уларга кўра, яна олти киши яраланган.

Фото: Ижтимоий тармоқлар

Нега Зиёбековни ушлагани боришганди?

Гувоҳларнинг «Азия-Плюс» нашрига айтишича, 25 ноябрь куни маҳаллий вақт билан соат 11:30да ҳуқуқни муҳофаза қилувчи орган ходимлари Гулбиддин Зиёбековни қўлга олиш учун борган. Йигит қаршилик қилган ва ходимларга мушт туширган. Воқеа жойида бўлган «ОМОН» ходимлари эса ўқ узган. Оқибатда уч киши яраланган. Улар орасида Гулбиддин ҳам бўлган. «Омончилар» уни ушлаб машинага солишган. Кейин эса йигитнинг ўлгани хабар қилинган. Гувоҳнинг сўзларига кўра, яраланган икки йигит ходимларга ҳаракатлари ноқонуний эканини айтган.

Шундан кейин одамлар туман марказига митингга чиққан. Улар Гулбиддиннинг бошида ўқ изи борлигини айтишмоқда.

Тоғли Бадахшон автономияси прокуратураси ахборот хизмати маълум қилишича, 1992 йилда туғилган Гулбиддин Зиёбеков гаровга олиш ва ижтимоий душманлик кайфияти уйғотганлик айблови билан қидирувда бўлган. Шунингдек, прокуратура маълумотига кўра, йигит ўзини қўлга олиш бўйича тезкор тадбир давомида ҳуқуқни муҳофаза қилувчи орган ходимларига ноқонуний сақлаб келган «Макаров» тўппончаси билан қаршилик қилган. Прокуратура расмийсига кўра, йигит 2020 йил февралида Роштқалъа туман прокурори ўринбосари Абдусалом Абризодани қўлга олиб, уни 8 соат давомида ушлаб турган ва калтаклаган. Шу сабаб Зиёбековга нисбатан жиноий иш очилган. Терговчининг сўровлари ва телефон қўнғироқларига жавоб бермагач, қидирувга берилган.

Аммо одамларнинг фикрича, прокуратурадагилар йигит прокурор ёрдамчисини нега гаровга олгани ҳақида айтишни истамаяпти. Уларнинг сўзларига кўра, прокурор ёрдамчиси Роштқалъада яшовчи қизни зўрлашга уринганида Гулбиддин уни қўлга олган. Қиз ҳолатни қариндошларига айтган ва улар бошқа ҳамқишлоқлари билан бирга прокурорни ушлаган.

«Азия-Плюс» билан суҳбатлашган одамлар исбот сифатида видео ҳам юборишган. Унда бир гуруҳ одамлар бир кишини ушлаб, унинг прокурор ёрдамчиси Абдусалом Абирзода экани ва уни нега ушлашганини айтишади. Қўлга олинган одам вилоят аҳлидан узр сўраб, унга қизнинг телефон рақамини милицияда ишловчи Ҳабиб берганини айтади. Видео охирида одамлар қўлга олинган одамга қараб «Биринчи кундан бизнинг аёллар, қизларга кўз олайтирма демаганмидик?» дейишади.

Намойишчиларнинг талаби маълум

Намойишлар 26 ноябрь куни ҳам давом этган. Тунни маҳаллий ҳокимият биноси олдида ўтказган намойишчилар Тоғли Бадахшон мухтор вилояти ҳокими билан учрашишга муваффақ бўлган. Ҳоким билан учрашганларнинг айтишича, уларга Гулбиддин ўлдирилиши бўйича иш 2-3 ой ичида тўлиқ ўрганилиши маълум қилинган.

Улар бунга эътироз билдиришган. «Биз Гулбиддинни ким ўлдирганини ҳам, майдонда ким ўт очганини ҳам биламиз. Бу ишни текширишга кўпи билан 10 кун вақт кетади. Бу қадар узоқ вақт суриштирув олиб боришларига қаршимиз», дейди хоруғликлар.

Намойишга чиққанлар қуйидагиларни талаб қилмоқда:

– Гулбиддин Зиёбеков ўлдирилиши бўйича ҳолатни қисқа муддатда ўрганиш;

– Хоруғдаги ҳарбийларнинг 60-70 фоизини кетказиб, уларнинг ўрнига маҳаллий йигитларни ишга олиш;

– Жамоат тартибини сақловчи идоралараро штаб фаолиятини ислоҳ қилиш;

– Хоруғдаги блогпостни олиб ташлаш;

– Вилоят ҳокимини ўзгартириш;

– Интернет алоқасини тиклаш ва ўчирмаслик.

Facebook'да Тоғли Бадахшон аҳли номидан ёзилгани айтилган баёнот пайдо бўлди.

«Тоғли Бадахшонда яшаётган ва бошқа ерларда бўлиб турган барча бадахшонликлар кичик ватанимизда яна бир марта ҳуқуқни муҳофаза қилувчи орган фаолияти билан боғлиқ адолатсизликка гувоҳ бўлдик. Оқибатда Хоруғдаги вазият кескинлашди.

Гулбиддин Зиёбековга қарши жиноий иш нотўғри очилган. У прокурор ўринбосарининг ҳирси қурбони бўлган синглисининг номусини ҳимоя қилишга чоғланганди. Бу ҳолатни исботловчи видео ўтган йилиёқ тарқатилди, аммо бу фактни эътиборга олмаган орган ходимлари Гулбиддиннинг ўзига нисбатан иш очишди. Охир-оқибат у ҳалок бўлди», дейилади фуқаролар баёнотида.

Россия пойтахти Москвада ҳам бадахшонликлар йиғилишди. Улар Тожикистоннинг Москвадаги элчихонаси олдида тўпланиб, Гулбиддин Зиёбековни ўлдирганлар жазоланиши кераклигини талаб қилишди.

Тожикистоннинг Москвадаги элчиси билан учрашганлардан бири Ораз Вазирбеков қандай талаблар қўйилганини гапириб берди.

«Помирда бўлаётган воқеаларга норозилигимизни билдирдик. Гулбиддин Зиёбековни қасддан ўлдиришган. Биз бу ишни қилганлар жазоланиб, қамоққа олиниши учун вақт бердик.

Иккинчи талабимиз шуки, Хоруғдаги блогпостни олиб ташлаб, ҳеч қачон қайта тиклашмасин. Учинчи талабимиз интернет алоқасини тиклаб, уни қайтиб ҳеч қачон ўчирмасликлари керак. Ҳар сафар интернет узилганда, биз яна шунча одам бўлиб элчихона олдига келаверамиз», деган Вазирбеков.

Намойишчилар ўзларининг бирорта саволларига жавоб берилмаганини айтишмоқда.

ТожикистоннингЛондондаги элчихонасида ҳам митинг бўлиб ўтди

Европа мамлакатлари ва АҚШдаги тожикистонликлар ҳам намойишга чиқиши кутилмоқда.

Кўпроқ янгиликлар