1 декабрдан метрода жетонларни қабул қилиш тўхтатилади 

Ўзбекистон 16:13 / 24.11.2021 12530

1 декабрдан Тошкент метрополитенида жетонларни қабул қилиш тўхтатилади. Бу ҳақда Транспорт вазирлиги хабар бермоқда.

2020 йилнинг 1 ноябридан бошлаб Тошкент метрополитенида жетонлар сотуви тўхтатилган эди. Бундан кўзланган мақсад - шаҳар жамоат транспорти автобус ва метрополитен йўналишларида автоматлаштирилган тўлов тизимини жорий этиш ишлари доирасида йўловчиларнинг ягона транспорт карталари орқали йўл ҳақи тўловларини амалга ошириши кўламини кенгайтириш, автоматлаштирилган тизим тўлақонли ишлаб кетиш жараёнини тезлаштириш, жамоат транспортида нақд пул муомаласидан воз кечиш.

Билдирилишича, ўтган бир йил мобайнида аҳолидаги мавжуд жетонлар йўл ҳақи тўлови учун қабул қилинди. Жорий йилнинг 1 декабрь санасидан бошлаб Тошкент метрополитенида йўл ҳақини тўлаш учун жетонларни қабул қилиш тўхтатилади. 

Маълум қилинишича, тўлов тизимида қулайлик яратиш мақсадида Тошкент метрополитенининг барча бекатлари QR кодли чипта, транспорт ва банк карталари ҳамда NFC функциялари орқали тўловларни амалга ошириш имконини берувчи стационар валидаторлар билан жиҳозланган.

Аввалроқ, Тошкент метросида FacePay тизими синов тариқасида ишга туширилгани хабар берилганди

Метрополитеннинг Буюк ипак йўли бекатида синов тариқасида ишга туширилган FacePay қурилмасида йўловчи валидаторга қараса етарли - йўл ҳақи банк картасидан автоматик тарзда ечиб олинади.

Кўпроқ янгиликлар