Туркия омбудсмани Ўзбекистон фуқароларининг ҳуқуқлари бузилиши бўйича мурожаатларни ҳал қилишда кўмаклашади

Жамият 19:25 / 23.11.2021 2609

22 ноябрь куни Ўзбекистон ва Туркия омбудсманлари ўртасида ҳамкорлик меморандуми имзоланди. Бу ҳақда Олий Мажлиснинг Инсон ҳуқуқлари бўйича вакили матбуот хизмати хабар бермоқда.

Меморандум доирасида Туркия ҳудудидаги Ўзбекистон фуқароларининг ва Ўзбекистон ҳудудидаги Туркия фуқароларининг ҳуқуқлари ва эркинликлари бузилиши ҳолатлари бўйича келиб тушган мурожаатларни ҳал этишда кўмаклашиш кўзда тутилган.

Шунингдек, инсон ҳуқуқларини таъминлаш юзасидан ўзаро тажриба алмашиш, ходимлар малакасини ошириш, ҳар иккала давлат учун долзарб бўлган мавзулар ва йўналишларда турли форум, конференция ва семинар-тренинглар ўтказиш ҳамда аҳолининг ҳуқуқий саводхонлигини оширишга қаратилган чора-тадбирларни амалга ошириш мақсад қилинган.

Ўзбекистон омбудсмани Феруза Эшматова ва Туркия парламентининг бош омбудсмани Шереф Малкўч ўртасидаги учрашувда икки давлат ўртасидаги муносабатлар тарихида янги саҳифа очилгани таъкидланди.

Шунингдек, Анқарага ташрифи доирасида Олий Мажлиснинг Инсон ҳуқуқлари бўйича вакили Феруза Эшматова Туркия Адлия вазирлиги ҳуқуқий масалалар бўйича бош директори Ҳоқон Ўзтатар, Буюк Миллат мажлисидаги «Туркия — Ўзбекистон» парламентлараро гуруҳи раиси Усмон Местен ҳамда Туркия Олий маъмурий суди президенти Зеки Йигит билан ҳам учрашди.

Учрашувларда инсон ҳуқуқларини таъминлашда парламентлараро, ҳукуматлараро ҳамкорликни ҳар томонлама мустаҳкамлаш масалалари муҳокама этилди ва ўзаро тажриба алмашилди.

Кўпроқ янгиликлар