“Фильмни тайёрлашга уч йил кетди”. Ўзбек анимацион фильми Япониядан иккита мукофот билан тақдирланди

Жамият 23:17 / 23.11.2021 6181

“Қиз ва булут” деб номланган ўзбек анимацион фильми Японияда бўлиб ўтган DigiCon6 Asia фестивалида “Фестивалнинг олтин фильми” ва “Минтақанинг олтин фильми” деб топилган. Бу ҳақда фильм режиссёри Шокир Холиқов фейсбук саҳифасида маълум қилди.

Фото: Facebook / Шокир Холиқов

“Фильм Усмон Азимнинг “Ёмғир ҳақида баллада” деб номланган шеъри мотивлари асосида яратилган. Киночиликда мойбўёқда ойнага чизиш деган усул бор. Бу жуда мураккаб усул ҳисобланади. Шу боис ҳар ким ҳам бу усулга қўл уравермайди. Шу пайтгача Ўзбекистонда бундай усулдаги анимацион фильм яратилмаганди. Биз бу борада биринчи бўлдик.Ушбу фильм уч йил мобайнида тайёрланган. Фильм учун тўрт мингдан кўпроқ сурат чизилган. Шунинг ўзи ҳам мойбўёқ усулининг қанчалик қийинлигини тасдиқлайди.

11 дақиқалик “Қиз ва булут”нинг режиссёри, сценарий муаллифи ва монтаж устаси ўзим. Фильм аниматори ва рассом – Эркин Хушматов. Оператор – Диёр Исматов. Овоз режиссёри – Жаҳонгир Мажидов. Продюсер Хуршид Алихўжаев”, дейди Шокир Холиқов.

Япония пойтахти – Токио шаҳрида ўтказиладиган DigiCon6 Asia қисқа метражли фильмлар фестивали 23 йиллик тарихга эга. Бу йилги танловда ушбу маданий тадбирда Япония, Жанубий Корея, Ҳиндистон, Эрон, Ҳонгконг, Хитой сингари 16 та мамлакатдан келган киноижодкорлар қатнашган.

Ўзбекистонликлар уч йилдан буён мазкур фестивалда қатнашиб келмоқда. Кинематография агентлиги томонидан бу йилги кинофестиваль учун ёш режиссёрлар Шокир Холиқовнинг “Қиз ва булут”, Феруз Баҳодировнинг “Уй”, Аббос Хуррамовнинг “Handkenchief” ва Иван Харитоновнинг “Гречка” фильмлари танлаб олинганди.

Фото: Facebook / Шокир Холиқов

“DigiCon6 Asia фестивалида ўзбекистонликлар илк марта қатнашган йили “Чой” номли фильмим худди “Қиз ва булут” сингари иккита мукофот билан тақдирланганди. Яъни “Фестивалнинг олтин фильми” ҳамда “Минтақанинг олтин фильми” деб топилганди.

“Қиз ва булут” учун берилган “Минтақанинг олтин фильми” номинацияси рағбатлантирувчи мукофот ҳисобланади. Фестивалнинг асосий мукофотлари иккита. Улардан бири “Фестивалнинг олтин фильми” деб номланади, бу бизга насиб этди. Бундан ташқари, фестиваль Гран-приси ҳам бор, у олий мукофот ҳисобланади. Бу йил Гран-при япониялик киноижодкорларга насиб этди”, дейди Шокир Холиқов.

Фото: Facebook / Шокир Холиқов

“Қиз ва булут” анимацион фильми бунгача Қирғизистонда бўлиб ўтган фестивалда ҳам “Энг яхши режиссёрлик фильми” номинацияси бўйича ғолиб деб топилган.

Аввалроқ режиссёр Шокир Холиқов бошчилигидаги ижодий жамоа ишлаган “Месси” қисқа метражли фильми Қозоғистоннинг Алмати шаҳрида ўтказилган 48 Hour film race фестивалининг бирйўла иккита мукофоти билан тақдирланганди.

Кўпроқ янгиликлар