Qirg‘izistonda bo‘lib o‘tgan xalqaro Qur'on musobaqasida 3-o‘rinni egallagan Habibulloh qori Olimjonovga mukofot sifatida bir yillik o‘quv shartnoma puli (13 974 000 so‘m) to‘lab berildi. Bu haqda Musulmonlar idorasi matbuot xizmati xabar berdi.

Bugun, 2 noyabr kuni Toshkent islom institutida bo‘lib o‘tgan taqdirlash tadbirida O‘zbekiston musulmonlari idorasi raisi, muftiy Nuriddin Xoliqnazarov g‘olibga o‘quv shartnomasi to‘langanligi yorlig‘ini topshirdi. «Qur'on va tajvidni o‘rgatish» bo‘limi, Toshkent islom instituti jamoasi tomonidan ham Habibulloh qori Olimjonov va uning ota-onasi, ustozlariga qimmatbaho sovg‘alar taqdim etildi.

Shuningdek, marosimda «Qur'on va tajvidni o‘rgatish» bo‘limi mudiri Shayx Alijon qori Fayzulla Maxdum o‘g‘li ham so‘zga chiqib, institut jamoasini munosib g‘alaba bilan muborakbod etish asnosida xalqaro Qur'on musobaqalarida ishtirok etish mahorati haqida so‘zlab berdi.

Eslatib o‘tamiz, joriy yilning 30 oktabr kuni Toshkent islom instituti talabasi Habibulloh qori Olimjonov Qirg‘iziston poytaxtida MDH respublikalari Qur'on hofizlari ishtirokida o‘tkaziladigan Xalqaro Qur'oni karim musobaqasida faxrli uchinchi o‘rinni egallagani xabar qilingan edi.