Qirg‘izistonda Botkendan Qo‘qongacha temiryo‘l qurilishi mumkin

Qirg‘izistonda Botken shahridan Qo‘qongacha temiryo‘l qurilishi mumkin. Bu haqda Qirg‘izistonning 2030 yilgacha mo‘ljallangan milliy rivojlanish dasturida (.pdf) qayd etilgan.

Dasturga ko‘ra, Botkendan Qo‘qongacha temiryo‘l qurilishi yangi ish o‘rinlari yaratilishiga, transport infratuzilmasi va savdo aloqalarining yaxshilanishiga xizmat qiladi. Loyihaning batafsil ma’lumotlari keltirilmagan.

Hozir Botkendan Qo‘qonga faqat avtomobil yo‘llari orqali borish mumkin va masofa 91 kilometrni tashkil qiladi. Temiryo‘l qurilishi bu masofani ancha qisqartiradi.

Qirg‘izistonning milliy rivojlanish dasturida Chotqol—Toshkent muqobil avtomobil yo‘lini barpo etish hamda boshqa trassalarni yangilash ham ko‘zda tutilgan.

Ushbu dastur 2030 yilgacha quyidagi maqsadlarga erishishni maqsad qilgan:

- YaIM hajmi – kamida 30 milliard AQSh dollari;

- aholi jon boshiga yalpi ichki mahsulot – 4 – 4,5 ming AQSh dollari;

- yalpi ichki mahsulotning nominal o‘sishining yillik sur’atini 11-12 foizni tashkil etishni ta’minlash;

- davlat tashqi qarzining hajmi yalpi ichki mahsulotning 60 foizigacha bo‘lgan darajada;

- ishsizlik - 5% dan ko‘p bo‘lmagan;

- 2030 yilda asosiy kapitalga yo‘naltirilgan investitsiyalar hajmi yalpi ichki mahsulotga nisbatan 20 foizdan kam bo‘lmasligi kerak;

- Inson taraqqiyoti indeksi bo‘yicha mamlakat 100 ta davlat qatoriga kirishi;

- Barqaror rivojlanish maqsadlariga (BRM) erishish bo‘yicha mamlakat yuqori 30 talikka kirishi.