Дизел ёнилғисига чегирмалар бекор бўлади: Фермер хўжаликлари ва бошқа ташкилотлар соляркани фақат биржа орқали харид қилишади

Иқтисодиёт 18:42 / 30.10.2021 15386

Бюджет ташкилотлари, пахта хомашёси ва ғалла ишлаб чиқарувчи фермер хўжаликлари ҳамда пахта-тўқимачилик кластерлари, «Ўзбекистон темир йўллари» АЖ, «Тошшаҳартрансхизмат» АЖ, маиший чиқиндиларни тўплаш ва олиб чиқиш бўйича давлат корхоналарига ҳам дизел ёнилғисини биржа орқали мустақил харид қилиши мумкин. Бу «Ўзбекнефтгаз» АЖ томонидан норматив-ҳуқуқий ҳужжатлари лойиҳалари муҳокамаси порталига қўйилган “Ўзбекистон Республикаси президентининг 2020 йил 4 апрелдаги «Нефть-газ тармоғининг молиявий барқарорлигини ошириш бўйича биринчи навбатдаги чора-тадбирлар тўғрисида»ги ПҚ-4664-сон қарорига ўзгартириш киритиш тўғрисида»ги қарори муҳокамадан ўтиб, тасдиқланса амалга ошади.

Қарор лойиҳаси билан президентнинг 4664-сонли қарорининг 8-банди 4-5-хатбошиларини чиқариб ташлаш кўзда тутилган.

Қарорнинг 8-бандида 4-5-хатбошиларида бюджет ташкилотлари, пахта хомашёси ва ғалла ишлаб чиқарувчи фермер хўжаликлари ҳамда пахта-тўқимачилик кластерлари, «Ўзбекистон темир йўллари» АЖ, «Тошшаҳартрансхизмат» АЖ, маиший чиқиндиларни тўплаш ва олиб чиқиш бўйича давлат корхоналарига дизел ёнилғиси (шу жумладан, ЭКО маркали дизел ёнилғиси) ўтган чоракдаги биржа савдолари натижаларига кўра шаклланган ўртача биржа нархлари бўйича тўғридан тўғри шартномалар асосида, шунингдек, уларга нефтни қайта ишлаш заводларидан нефть маҳсулотларини биржа савдолари орқали харид қилиш ҳуқуқини тақдим этган ҳолда сотилиши; нефтни қайта ишлаш заводлари «Ўзбекнефтгаз» АЖ нефть базаларининг буюртманомаларига кўра кўрсатиб ўтилган истеъмолчиларга сотилган дизел ёнилғиси (шу жумладан ЭКО маркали дизел ёнилғиси) ҳажми учун «Ўзбекнефтгаз» АЖ томонидан белгиланадиган чегирмани тақдим этиши белгилаб қўйилган эди.

Президентнинг янги қарори билан дизел ёнилғиси (асосан соляркалар) харид қилиш учун бир қатор ташкилотларга тўғридан тўғри шартномалар тузиш, «Ўзбекнефтгаз» АЖ томонидан белгиланадиган чегирмани тақдим этиш бекор бўлмоқда.

Қарор муҳокамаси 13 ноябргача давом этади.

Кўпроқ янгиликлар