Қашқадарёда ўзини Kun.uz сайти ходими деб таништирган сохта мухбир қамоққа олинди

Жамият 19:51 / 20.10.2021 8012

Қашқадарё вилоят ИИБ ахборот хизмати расмий муносабатига кўра, Муборак тумани «Машъал» МФЙда яшовчи фуқаро А.Т. 2021 йил 31 август куни соат 11:00ларда телефон орқали 102 хизматига мурожат қилган. У мурожаатида давлат идораларига ўзини Kun.uz сайтининг мухбири деб таништирган шахс агар шартнома тузиб, 2 млн 600 минг сўм пул бермаса, тумандаги салбий ҳолатларни Kun.uz сайтида эълон қилиб юбориш билан таҳдид қилганини билдирган.

Натижада, масъул идора вакили унинг қўлига 100 АҚШ доллари ва 500 минг сўм пул берган, шунингдек, унинг талабига кўра, Т.Р. исмли фуқаро (аёл) пластик карта рақамига 1 млн сўм ўтказиб берган.

Бироқ, кейинчалик ўзини Kun.uz сайти мухбири сифатида таништирган шахс аслида Ғузор туманида яшовчи фуқаро М.А. эканлиги, у Kun.uz сайти ходими эмаслигини билгач, унга нисбатан қонуний чора кўрилишини сўраб мурожаат қилган.

Мазкур ҳолат юзасидан гумонланувчи М.А.га нисбатан Муборак тумани ИИБ ҳузуридаги Тергов бўлими томонидан ЖКнинг 165-моддаси (Товламачилик) 2-қисми «а» банди билан жиноят иши қўзғатилиб, қамоқ эҳтиёт чораси қўлланган. Айни пайтда дастлабки тергов ҳаракатлари олиб борилмоқда.

Таҳририятдан:

Бу каби воқеалар сайт нуфузига салбий таъсир ўтказиши мумкинлиги, шу сабабли юқоридаги каби шахсий манфаат, тамагирлик ва товламачилик каби ҳолатларнинг олдини олиш мақсадида таҳририят штатида турган журналистлар ва мухбирлар ҳақидаги маълумотлар Kun.uz жамоаси бўлимида жойлаштирилган.

Kun.uz мухбирини қандай таниб олиш мумкин?

Мурожаатчилар билиши керакки, сиз таҳририятга йўллаган мурожаатни ўрганиш учун Kun.uz мухбири сиздан ҳеч қандай пул ёки хизмат талаб қилмайди. Барча харажатлар таҳририят ҳисобидан қопланади.

Раҳбарлар ёки мутасаддилар ҳузурига борган Kun.uz мухбири аввало ўзини таништириб, албатта сайт томонидан тақдим этилган хизмат гувоҳномасини кўрсатади ёки унинг сайт томонидан тақдим этилган хизмат бейжиги бўлади.

Юқоридаги суратларда тасвирланган гувоҳнома ёки бейжик эгасини сайтга кириб, таҳририятда ишлаш-ишламаслигини текшириб кўриш мумкин.

Агар сизнинг ҳузурингизга Kun.uz’да ишлайман деб борган мухбирнинг исм-фамилияси ва фотосурати таҳририят аъзолари рўйхатида бўлмаса, демак у Kun.uz’дан эмас. Ушбу ҳолатда зудлик билан ҳуқуқни муҳофаза қилувчи органларга мурожаат қилиш тавсия этилади.

Кўпроқ янгиликлар