Зафар Ҳошимов сўнгги беш йилликда тадбиркорлар ҳаётида рўй берган ўзгаришларни санади

Иқтисодиёт 20:47 / 19.10.2021 15123

Korzinka.uz супермаркетлар тармоғи асосчиси ва раҳбари Зафар Ҳошимов президент сайловлари арафасида Ўзбекистонда Шавкат Мирзиёев президентлиги даврида амалга оширилган ислоҳотларни эътироф этди ва келажакда ҳам бундай ишлар давом этишига ишонч билдирди.

«Сайловолди кунлари ҳақли равишда сарҳисоб давридир, ўтган беш йилга назар ташлаб, нималар ўзгарганига баҳо бериш чоғи келди.

Жамиятимиз ва мамлакатимиз учун ҳамма жабҳаларида катта ижобий ўзгаришлар бўлиб ўтди», дейди у.

У тадбиркорлар ҳаётида қандай ўзгаришлар бўлганини санаган:

  • Авваламбор, тадбиркорлар таҳдид, таҳлика, тажовузлардан қутулдик. Беҳисоб текширув ва назоратлар бартараф этилди. Тадбиркорликнинг давлат ва жамият олдидаги мавқейи ва обрўси ошди;
  • Конвертация очилди: қора, оқ, бозор, биржа курслари тугатилиб, ягона, бозор тамойилларига асосланган валюта курси ўрнатилди. 
  • Пул айланмаси соҳасидаги номутаносибликлар бартараф этилди: нақд ва нақдсиз/ пластик картадаги пуллар тафовутлари йўқ қилинди;
  • Солиқ ислоҳотлари амалга оширилди, жумладан: 1) ҚҚС ставкаси 20 фоиздан 15 фоизга туширилди ва келажакда 12 фоизга туширилиши кўзда тутилмоқда; 2) Жисмоний шахслар даромад солиғи ҳамда ижтимоий тўловлар ҳажми кескин пасайтирилди; 3)мулк солиғи туширилиши маълум қилинди; 4) ҳисоб фактура, чеклар, ишончномалар рақамли онлайн тизимга ўтказилди.
  • Божхона ислоҳотлари, божхона расмиятчилиги кескин қисқартирилиши, умуман олганда, ташқи иқтисодий фаолият эркинлаштирилди;
  • Чет элликлар, мутахассислар ва туристлар келишидаги виза чекланувлари деярли тамом қилинди;
  • Чет элга чиқишда икки йиллик виза бекор бўлиши ва тўлақонлик паспорт ва ID-тизимлари киритилиши;
  • Ишга ходим олишда прописка талаб қилиниши бекор этилгани;
  • Олий маълумот қамровини кенгайтириш, янги хусусий университетлар очилиши;
  • Сиртқи ва кечки ўқиш форматлари тикланиши;
  • Ёшларни ишга қабул қилган корхоналар ижтимоий тўловлардан озод этилиши;
  • Макроиқтисодий маълумотлар эркинлиги: халқ хўжалиги, пул-кредит, бюджет даромадлари ва сарф-харажатлари, давлат харидлари, ташқи савдо, ташқи қарз, олтин-валюта захиралари, инфляцион кутилмалар ва бошқа юзлаб соҳа, тармоқ ва макроиқтисодий ахборотлар шаффофлиги;
  • Ер тақсимланишидаги шаффофлик - электрон аукцион тизими жорий қилиниши;
  • Жадал хусусийлаштириш, шу жумладан, қатор давлат корхоналари, объектлари ва банкларини хусусийлаштириш сари босилган қадамлар;
  • Экспортни қўллаб-қувватлаш. Жумладан, қишлоқ хўжалик маҳсулотлари экспортчиларига транспорт харажатларининг ярми давлат томонидан қопланиб берилиши;
  • Пандемия даврида берилган қатор имтиёз ва эркинликлар. Ва бошқа катта-катта ислоҳотлар. 

«Ушбу ислоҳотларни санайверсак, поёнига етмаймиз. Яна қанчадан қанча ислоҳотлар бизни олдинда кутяпти. 

Бундан беш йил аввал президент сайловига бағишланган постимда мен Шавкат Мирзиёевга овоз бергани бора туриб, #умидбилан, деб ҳэштег қўйган эканман. Эндиликда эса, бу сайловда анча умидларим тутилиб, бу постимнинг янги ҳэштеги - #ишончбилан», дея якунлаган у ўз постини.

Кўпроқ янгиликлар