Bekobod shahri qora metallurgiya markaziga aylantiriladi - Shavkat Mirziyoyev

“Chirchiq shahrida yiliga 7 ming dona traktor, kombayn va boshqa qishloq xo‘jaligi texnikalari klasteri o‘z faoliyatini boshlaydi. Bekobod shahri qora metallurgiya markaziga aylantiriladi va “Metkombinat”ning quvvatlari kamida 2 barobarga oshiriladi. Jumladan, qiymati 770 million dollarlik quyuv-prokat majmuasini ishga tushirish hisobiga, ishlab́ chiqarish hajmi 2,3 million tonnaga yetkaziladi.

Shuningdek, Parkent tumanidagi mavjud 27 million tonna temir rudasini o‘zlashtirish boshlanadi. Bekobod shahrida sanoat zonasi tashkil etilib, qurilish, sanoat, uy-ro‘zg‘or uchun metall mahsulotlari ishlab chiqaradigan 100 dan ortiq loyihalar amalga oshiriladi.

Olmaliq kombinati va O‘zmetkombinat tomonidan kichik biznes bilan kooperatsiya asosida elektrodvigatellar, filtrlar, moylar va podshipniklar kabi mahsulotlar va xizmatlar uchun keyingi yilda 250 milliard so‘mlik, 2026 yilga borib esa, 1 trillion so‘mlik bozor yaratiladi. Sanoat korxonalari va aholi tomonidan elektr energiyasiga bo‘lgan ehtiyojni inobatga olib, Chotqol va Pskom daryolarida jami quvvati 621 Mega-Vatt bo‘lgan 3 ta yangi gidro elektrstansiyasi quriladi. Bunga 1,2 milliard dollar investitsiya yo‘naltiriladi. 

Qibrayda 450 million dollar to‘g‘ridan to‘g‘ri investitsiya hisobidan, jami quvvati 710 megavattga teng bo‘lgan 3 ta issiqlik elektr stansiyasi quriladi. Natijada, viloyatda iste'molchilarga 21 milliard kilovatt soat yoki 2 barobar ko‘p elektr energiya yetkazib berish imkoniyati yaratiladi”, dedi prezidentlikka nomzod.