Маълум қилинишича, тезкор тадбирда аввалдан кузатувга олинган шахс бошқарувидаги «Камаз» юк автотранспорт воситаси «Сирдарё» чегара божхона постида тўхтатилиб, белгиланган тартибда кўздан кечирилган. Текширувда салондаги спорт сумкасига 8 бош лочин яширилгани аниқланган.

«Қушларга шафқатсизларча муносабатда бўлинган, жонзотлар сумкага уларнинг ҳаёти учун хавфли тарзда зичлаб жойлаштирилган. Шу куни тезкор тадбир Сирдарё туманида ҳам давом эттирилиб, ушбу қушларни сотиб олаётган шахс ҳам қўлга олинди.

Мазкур ҳолатда ушлаб қолинган 8 бош лочин Ўзбекистоннинг 2019 йилда чоп этилган Қизил китобига киритилган ва табиатан камёб ҳисобланади ҳамда уларни овлаш тақиқланган. Лочинларнинг 6таси Қизил китобга Итолғи номи билан киритилган бўлиб, улар тобора йўқолиб бораётган тур ҳисобланади», – дейилади қўмита тақдим қилган маълумотда.

Шунингдек, суриштирувлар давомида қонунбузарлар ушбу қушларни 280 миллион сўмга пулламоқчи бўлгани маълум бўлган. Ҳозирда лочинлар Тошкент ҳайвонот боғига вақтинча сақловга топширилди ва мутахассисларнинг доимий назорати остида парваришланмоқда.

Ҳолат юзасидан божхона органлари томонидан суриштирув ҳаракатлари давом эттирилмоқда.