“Жамоат хавфсизлигини таъминлаш ва жиноятчиликка қарши курашиш соҳасида ички ишлар органлари фаолиятини сифат жиҳатидан янги босқичга кўтариш чора-тадбирлари тўғрисида”ги президент фармони, шунингдек, “Ички ишлар органларида энг яхши ходимларни аниқлаш бўйича республика танловини ташкил этиш чора-тадбирлари тўғрисида”ги ҳукумат қарорига асосан ички ишлар органлари ходимлари фаолиятини янада рағбатлантириш, ходимлар ўртасида соғлом рақобат муҳитини шакллантириш мақсадида ҳар йили ички ишлар органларида энг яхши ходимларни аниқлаш бўйича республика кўрик-танловини ўтказиш йўлга қўйилган.

Мазкур танлов икки босқичдан – ҳудудий саралаш ва республика-финал босқичларидан иборат. Танлов “Энг яхши профилактика инспектори”, “Энг яхши терговчи”, “Энг яхши тезкор ходим”, “Энг яхши ҳудудий ички ишлар органи бошлиғи” каби номинациялар бўйича ўтказилади. Иштирокчилардан соҳада камида бир йил амалий иш тажрибасига эга бўлиш талаб этилади.

Иштирокчилар жисмоний тайёргарлик, ўқ отиш бўйича баҳсларда иштирок этишади. Шунингдек, танловда қатнашаётган профилактика инспекторларининг назарий билим даражаси, интеллектуал ва индивидуал психологик даражасини аниқлаш бўйича тест синовлари ҳамда оғзаки суҳбат орқали текширилади.

Ички ишлар вазирлигининг ИИВ Ҳуқуқбузарликлар профилактикаси бош бошқармасининг Kun.uz’га маълум қилишича, “Энг яхши профилактика инспектори” кўрик-танловининг ҳудудий босқичида биринчи, иккинчи ва учинчи ўринларни эгаллаган жами 42 нафар профилактика инспектори республика босқичида иштирок этиш ҳуқуқини қўлга киритган. Танловнинг республика босқичи икки кун давомида, яъни 13–14 октябрь кунлари Тошкентда бўлиб ўтади.

Ҳукумат қарорига кўра танловнинг республика босқичи ғолиблари бир ойлик пул таъминотининг 50 фоизи миқдорида, иккинчи ва учинчи ўринларни эгаллаган ходимлар тегишлича бир ойлик пул таъминотининг 20 ва 10 фоизи миқдорида бир йил давомида моддий рағбатлантирилиши белгиланган.

“Энг яхши профилактика инспектори” кўрик-танлови ғолиб ва совриндорлари 25 октябрь – Ички ишлар органлари ходимлари кунида эълон қилинади. Ғолибларни тақдирлаш маросими 28 октябрь куни ўтказилиши белгиланган.