Канада 40 минг афғон қочқинини қабул қилади

Жаҳон 10:12 / 13.10.2021 4277

Канада ҳукумати Афғонистондан АҚШ ва бошқа давлатларга эвакуация қилинадиган 40 минг афғонни қабул қилмоқчи. Бу ҳақда Канада бош вазири Жастин Трюдо Twitter’да маълум қилди.

“Канада 40 минг афғон қочқинини қабул қилади ва биз бошқа давлатларни ҳам афғонистонлик қочқинларни хавфсиз жойлаштиришда ўз саъй-ҳаракатларини фаоллаштиришга чақирамиз”, деб ёзган Трюдо. Унинг таъкидлашича, Оттава нафақат Афғонистондаги миссия вақтида канадалик ҳарбийларга ёрдам кўрсатган афғонлар ва уларнинг оила аъзоларини, балки мамлакатнинг инсонпарварлик дастурларига мос келадиган бошқа афғонларни ҳам қабул қилади.    

Август охирида Канаданинг иммиграция, қочқинлар ва фуқаролик масалалари бўйича вазири Марко Мендичино мамлакат 5 минггача афғон қочқинини қабул қилишини айтган.

Аввалроқ Канада Афғонистондан мустақил равишда 3,7 минг кишини, жумладан канадаликларни ва афғонларни олиб чиққанди. Охирги 2 ой давомида Оттаванинг сўрови билан Афғонистондан Қатарга яна 100 дан кўпроқ одам олиб чиқилган.

Трюдонинг маълум қилишича, “Катта йигирматалик” давлатлари Афғонистонда инсон ҳуқуқлари ҳимоясини қўллаб-қувватлашни давом эттиради ва афғонларни зарур инсонпарварлик ёрдами билан таъминлаш бўйича саъй-ҳаракатларини кучайтиради.

12 октябрда “Катта йигирматалик”нинг Афғонистонга бағишланган фавқулодда саммити видеоанжуман шаклида бўлиб ўтди. Саммитда халқаро гуманитар ва молиявий ташкилотлар вакиллари ҳам иштирок этди.

Кўпроқ янгиликлар