Бразилия президенти футбол учрашувига қўйилмади

Жаҳон 11:23 / 11.10.2021 5903

Бразилия президенти Жаир Болсонару Сан-Паулу штатидаги Перуйбе шаҳрига ташрифи вақтида ҳимоя ниқобисиз бўлгани учун жаримага тортилди. Кейинроқ у коронавирусга қарши эмланмагани сабабли футбол учрашувига ҳам киритилмаган.

Globo телеканалининг хабар беришича, президент 9 октябрда шаҳар бўйлаб сайр қилган, маҳаллий аҳоли билан суратга тушган. У кун давомида мамлакатда ҳамон тақилиши талаб қилинаётган ҳимоя ниқобисиз бўлган.

“Шаҳар маъмуриятининг таъкидлашича, президентга 500 доллар жарима солинган”, деб маълум қилган телеканал.

Ўша куни Болсонару Бразилия чемпионати доирасида ўтган “Сантос” ва “Гремио” клублари ўртасидаги футбол учрашувига кира олмаган. Бу ҳақда унинг ўзи журналистларга маълум қилган.

“Мен “Сантос”нинг ўйинини кўрмоқчи эдим, бироқ менга эмланишим кераклиги айтилди. Нима учун? Ахир менда эмланганлардан кўра кўпроқ антитанача бор”, деб таажжуб билдирган Бразилия етакчиси.

Болсонарунинг таъкидлашича, ковид-паспортлар ва жамоат жойларида эмланмаганлар учун чекловлар киритилишига йўл қўйиб бўлмайди.

Бразилия президенти 20 августда Рибейра водийсидаги 4 та шаҳарга ташрифи вақтида ҳам санитар чекловларга амал қилмагани учун жаримага тортилганди.

Бундан ташқари, Болсонару коронавирусга қарши эмланмагани учун сентябрда БМТ Бош ассамблеясига ташрифи вақтида Нью-Йоркдаги ресторанга киритилмаганди. Шу сабабли Болсонару ва унга ҳамроҳлик қилган делегация кўчада, ресторанга кириш жойида овқатланишига тўғри келган.

Кўпроқ янгиликлар