Ўзбекистон – энг паст нархда хурмо экспорт қилувчи давлат. Бунинг сабаби нимада?

Иқтисодиёт 16:09 / 08.10.2021 27717

2020 йилда жаҳон бозорида хурмо экспорти 11 фоизга ошиб, 637 минг тоннани ташкил этган. Ўз навбатида, олинган даромад ҳам 17 фоизга ўсиб, 695 миллион долларга етган. Бу ҳақда EastFruit IndexBox маълумотларига таяниб хабар бермоқда.

Хурмо экспорти

2020 йилда энг кўп хурмо экспорт қилган мамлакатлар сифатида: Испания (211 минг тонна), Озарбойжон (126 минг тонна), Хитой (108 минг тонна) ва Ўзбекистон (97 минг тонна) қайд қилинган. Ушбу 4та мамлакатнинг умумий хурмо экспортидаги улуши 85 фоизни ташкил қилган. Кейинги ўринларни Литва (14 минг тонна), Полша (12 минг тонна) ва Грузия (11 минг тонна) эгаллаган.

Даромад нуқтайи назаридан қаралса, Испания (234 миллион доллар), Хитой (206 миллион доллар) ва Озарбойжон (92 миллион доллар) хурмо экспортидан энг кўп пул ишлаб топган, уларнинг умумий даромаддаги улуши 77 фоизни ташкил этган.

Ўтган йилда Хитой (62,1 фоиз) ва Ўзбекистон (48 фоиз) экспорт қилишда энг юқори ўсиш суръатларига эришган.

Хурмонинг ўртача экспорт нархи 2020 йилда 6,4 фоизга қимматлашиб, бир тоннаси учун 1091 долларни ташкил этган. Энг юқори нархга хурмо экспорт қилган мамлакат Хитой (1 тонна учун 1909 доллар), энг паст нархларда эса Ўзбекистон (бир тонна учун 499 доллар) экспорт қилган.

Хурмо импорти

2020 йилда хурмо импорт қилувчи асосий давлат Россия бўлган, ўтган йилда мамлакат ички бозорларига 149 минг тонна хурмо олиб кирилган. Бу жаҳон импортининг 27 фоизини ташкил қилади. Ундан кейинги ўринларни: Қозоғистон (58 минг тонна), Германия (55 минг тонна), Украина (40 минг тонна), Италия (31 минг тонна), Таиланд (28 минг тонна) ва Франция (28 минг тонна) эгаллаган. Бу мамлакатларнинг умумий улуши жаҳон импортининг 44 фоизини ташкил этади. Шунингдек, хурмо сотиб олишда жаҳон миқёсида Беларус (19 минг тонна), Литва (16 минг тонна), Полша (12 минг тонна), Канада (9,3 минг тонна) ва Буюк Британия (8,4 минг тонна) ҳам маълум улушга эга.

Хурмо импортига Россия (120 миллион доллар), Германия (75 миллион доллар) ва Франция (37 миллион доллар) энг кўп пул сарфлаган ва бу жаҳон хурмо импортига ажратилган маблағларнинг 43 фоизини ташкил қилади.

Ўзбекистонда хурмо экспорти

Давлат статистика қўмитаси маълумотларига кўра, Ўзбекистон 2020 йилда 18та хорижий давлатга қиймати 48,6 млн долларга тенг 97,5 минг тонна хурмо экспорт қилган. Бу кўрсаткич 2019 йилнинг мос даври билан солиштирилганда 50,1 минг тоннага кўпроқ. Юқорида айтиб ўтилганидек, мамлакатда хурмо экспорти юқори бўлса-да, даромад миқдори бошқа экспортчиларга нисбатан сезиларли даражада камроқ. Буни ўзбек хурмосининг асосан ички бозорида нархлар унча юқори бўлмаган Марказий Осиё ва МДҲ мамлакатларига экспорт қилиниши билан изоҳлаш мумкин. Хусусан, 2020 йилда Ўзбекистон энг кўп хурмо экспорт қилган давлатлар:

  • Қозоғистон – 56,8 минг тонна;
  • Россия – 32,1 минг тонна;
  • Қирғизистон – 3,1 минг тонна;
  • Туркманистон – 2,8 минг тонна;
  • Украина –1,8 минг тонна;
  • Беларусь – 818,1 тонна.
Кўпроқ янгиликлар