Қашқадарё вилояти Миришкор туманида маҳалладошини пичоқлаб, унга тан жароҳати етказган шахсга жиноят иши қўзғатилган. Бу ҳақда вилоят ИИБ ахборот хизмати хабар бермоқда.
Маълум қилинишича, 2021 йил 2 октябрь куни Миришкор тумани «Янгиқишлоқ» МФЙда яшовчи фуқаро А.Д. ўзаро келишмовчилик туфайли маҳалладоши У.О.ни «Помуқ» МФЙга қарашли чўл ҳудудида жойлашган чайласига чақирган.
Шу куни соат 10:30ларда У.О. чайлага келгач А.Д. билан ўзаро тортишиб қолган. Тортишув давомида А.Д. ошхона пичоғи билан рақибининг чап кўкрак, томоқ ва бош соҳаларига тан жароҳати етказган. Ўз навбатида У.О. ҳам ўша атрофда турган паншаха билан А.Д.га қаршилик кўрсатгани сабабли А.Д. воқеа жойидан қочиб яширинган.
Шундан сўнг, У.О. қўнғироқ қилиб синфдошини ёрдамга чақирган ва унинг ёрдами билан шифохонага борган. Шифокорлар томонидан кўрсатилган тиббий ёрдам натижасида У.О.нинг ҳаёти сақлаб қолинган.
Қайд этилишича, мазкур ҳолат юзасидан А.Д. Жиноят процессуал кодекснинг 221-моддаси тартибида ушланган. Ҳолат бўйича туман прокуратураси томонидан Жиноят кодексининг 25, 97-моддаси 1-қисми билан жиноят иши қўзғатилган.
Таъкидланишича, 2021 йил 5 октябр куни Миришкор туман «Янгиқишлоқ» МФЙда содир этилган мазкур жиноят муҳокамасига бағишланган йиғилиш бўлиб ўтган. Унда Миришкор туман ИИБ бошлиғи подполковник М.Бўриев ҳамда сектор ишчи гуруҳи ҳамда мутасадди идоралар вакиллари иштирок этган. Муҳокамада бу жиноятни юзага келтирган шарт-шароит ва омиллар атрофлича таҳлил этилган. Келгусида бу каби ҳолатлар юз бермаслиги учун масъул мутасаддиларга аниқ вазифалар берилиб, улар огоҳлантирилган.
