«Ўзмиллийбанк» АЖ ва «Совкомбанк» ОАЖ (Россия) 50 млн АҚШ доллари миқдоридаги бош келишувни имзолади

Иқтисодиёт 17:00 / 30.09.2021 13947

Жорий йилнинг 29-30 сентябрь кунлари Тошкент шаҳрида бўлиб ўтган “Ўзбекистон: иқтисодий ислоҳотлар сарҳисоби ва истиқболи” номли халқаро иқтисодий форум доирасида, “Ўзбекистон Республикаси Ташқи иқтисодий фаолият миллий банки” Акциядорлик жамияти ва Россиянинг “Совкомбанк” ОАЖ ўртасида 50 млн АҚШ долларига тенг Бош келишув имзоланди.

Ушбу Бош келишув “Совкомбанк” ОАЖдан 7 йил муддатгача молиялашнинг рақобатбардош ва жозибадор шартларида, Ўзбекистон Республикаси ҳукуматининг кафолатисиз ва экспорт кредитлаш агентликларининг суғурта қопламаларисиз кредит линиясини жалб қилишни кўзда тутади.

Кредит линиясининг афзаллиги шундаки, у нафақат Россиядан, балки бошқа мамлакатлар (Европа Иттифоқи, Туркия, Италия, Хитой)дан товар, асбоб-ускуна ва хизматлари хариди билан боғлиқ инвестицион ҳамда кичик ва ўрта бизнес лойиҳаларини молиялаштириш имконини беради.

Россия банки билан имзоланган келишув, Ўзбекистон Республикаси Президентининг Россия Федерацияси билан стратегик ва ҳамкорлик муносабатларини ривожлантириш ҳақидаги топшириғини ижро этишга имкон беради. Шу жумладан, янги ишлаб чиқаришни молиялаш ва мавжуд ишлаб чиқариш қувватини ошириш, янги ишлаб чиқариш зоналарини яратиш ва натижада, янги ишчи ўринлари яратишга асос бўлади.

2020 йилда бошланган ҳамкорлик доирасида банкларнинг кооперацияси улар ўз фаолияти чегараларини, айниқса лойиҳа ва савдони молиялаш, экспорт-импорт операцияларини молиялаш, ғазначилик операцияларини ўтказишда кенгайтирди.

Имзоланган янги Бош келишув Россия Федерацияси ва Ўзбекистон банклари ҳамкорлигида самарадорликни оширишда янги қадам бўлиб хизмат қилади.

Ўзбекистон иқтисодий форуми – 2021, Ўзбекистон Республикаси Молия Вазирлиги ва Иқтисодий тараққиёт ва камбағалликни қисқартириш Вазирлиги ташаббусига кўра, Жаҳон банки ва Халқаро молия корпорацияси кўмагида ташкил этилди. У 350дан ортиқ халқаро ва ўзбек ишбилармон ва молия соҳаси мутахассислари, халқаро молия институтлари, давлат арбоблари, нодавлат ташкилотлари ва оммавий ахборот воситаларини бирлаштирди.

Маълумот ўрнида: “Совкомбанк” ОАЖ универсал тижорат банк бўлиб, 1990 йилнинг 1 ноябрь куни Кострома шаҳридаги бош офиси билан рўйхатдан ўтган. Тизимда юқори поғоналарга эга бўлиб, Россия банклари ичида активлари (21,2 млрд. АҚШ доллари) бўйича 9-ўринни эгаллайди.

“Ўзмиллийбанк” АЖ Матбуот хизмати Ⓣ

Кўпроқ янгиликлар