Joriy yilda doktorantura imtihonlari an'anaviy tarzda o‘tkaziladi

Qayd etilishicha, doktoranturaga kirish imtihonlari va suhbat jarayonlarini videokuzatuv ostida (onlayn translatsiya) o‘tkazish choralari ko‘riladi.

Tayanch doktoranturaga kirish imtihonlari bo‘yicha topshiriladigan birinchi fan (mutaxassislik yoki chet tili) umumiy ballining 50 foizidan kam ball to‘plagan talabgorlar keyingi bosqichga o‘tkazilmaydi.

Shuningdek, ma'lum qilinishicha, tayanch doktoranturaga kirish imtihonlaridagi savollar bir ixtisoslikdan boshqa ixtisoslikka to‘g‘ri kelmagani sababli ko‘chirish mumkin emas.

Bildirilishicha, normativ-huquqiy hujjatlarda mustaqil izlanuvchilikka rasmiylashtirilgan shaxs tayanch doktoranturaga hujjat topshirishi mumkinligi va mumkin emasligi to‘g‘risida normalar berilmagan. Shu munosabat bilan, hujjat topshirishda mustaqil izlanuvchilikka rasmiylashtirilgan ilmiy yoki ta'lim tashkilotlarining ruxsatiga asosan topshirish maqsadga muvofiq.

Stajyor-tadqiqotchilik esa ishlab chiqarishdan ajralgan holda tegishli ixtisoslik bo‘yicha ilmiy va ilmiy-ijodiy izlanishlarni olib borish va falsafa doktori (PhD) ilmiy darajasini olish uchun izlanuvchini tayyorlash shakli hisoblanib, ushbu shaklda o‘qigan shaxsga hech qanday imtiyoz berilmaydi.