“Йил охиригача 1900, беш йилда 2800 доллар” – Илҳом Норқулов аҳоли жон бошига тўғри келадиган ЯИМ ҳақида

Иқтисодиёт 19:29 / 24.09.2021 18697

Келгуси беш йилда аҳоли жон бошига тўғри келадиган ЯИМ миқдори ҳар йили 180 доллардан ошириб борилади ва 2800 долларга етказилади. Бу ҳақда 24 сентябр куни “Ўзбекистоннинг барқарор ривожланиши” мавзусида бўлиб ўтган халқаро конференцияда Иқтисодий тараққиёт ва камбағалликни қисқартириш вазирининг биринчи ўринбосари Илҳом Норқулов маълумот берди. 

“Беш йилда аҳоли жон бошига тўғри келадиган ЯИМ миқдорини 2800 долларга олиб чиқмоқчимиз. Бу ўтган йил 1750, жорий йил 1900 доллар атрофида кутилмоқда. Бу ўрта даромадли мамлакатларнинг юқори гуруҳига кириш учун замин яратади”, – дея унинг сўзларини келтирмоқда Kun.uz мухбири.

Шунингдек, у келгусида давлат хусусий ва хорижий инвестицияларга эътибор қаратиш кераклиги ҳақида гапирди.

“Макроиқтисодий барқарорлик таъминлашда муҳим нарсани айтиш лозим: охирги беш йилда давлат ресурслари асосан иқтисодий ўсишни қўллаб-қувватлаган бўлса, энди биз хусусий ва хорижий инвестициялар ролини кучайтиришимиз керак. Бу йўналишда БМТнинг ривожланиш дастури билан алоҳида лойиҳамиз бор. Бу лойиҳадан шундай хулоса олдикки, кўпроқ ижтимоий соҳада ва инфраструктурада нафақат давлат, балки хусусий сектор инвестициясини, давлат-хусусий шерикчилик асосида катта лойиҳаларни қилиш имкониятимиз бор. Энг асосийси, барқарорликни таъминлашда давлат секин-аста ўз иштирокини камайтириб, хусусий секторга ривожланиш учун шароит яратиши керак.

Олий Мажлисга қишлоқ хўжалигига мўлжалланмаган ерларни хусусийлаштириш бўйича норматив-ҳуқуқий ҳужжат лойиҳаси муҳокамага киритилди. Бунда қишлоқ хўжалигига мўлжалланган ерларни узоқ муддатли ижарага бериш, уни бозор активи сифатида бериш назарда тутилган”, – деди у.

Аввалроқ иқтисодий тадқиқотлар ва ислоҳотлар маркази директори Обид Ҳакимов аҳоли жон бошига тўғри келадиган ЯИМ миқдори ва аҳоли даромадлари ўртасида фарқ борлигини айтганди.

“Аҳоли жон бошига тўғри келадиган ялпи ички маҳсулот тушунчасини аҳоли даромадлари билан чалкаштирмаслик керак. Ҳозир Ўзбекистонда ЯИМ номинал бўйича 1750 доллар атрофида. Ўртача ойлик иш ҳақи эса 2,6 миллион сўм, Тошкент шаҳрида 4,2 миллион сўм. Иккала тушунча ўртасида фарқ бор”, – деганди у.

Кўпроқ янгиликлар