OTB mamlakat iqtisodiyotining 2021 yilning birinchi yarmida 6,2 foizga o‘sishini qayd etgan. Bunga birinchi navbatda sanoatda ishlab chiqarish hajmining o‘tgan yilga nisbatan oshishi tufayli erishilgani aytilgan. Shuningdek, xizmat ko‘rsatish sohasidagi o‘sish 8 foizgacha tezlashgan.

«Hukumatning SOVID-19ga qarshi emlash dasturini samarali amalga oshirishi O‘zbekiston xalqini himoya qilish, ishonchni tiklash va joriy yilning birinchi yarmidagi istiqbolli o‘sishning asosi bo‘ldi», deya ta'kidlagan OTBning O‘zbekistondagi vakolatxonasi rahbari Sindi Malvichini.

Inflatsiya 2021 yilning birinchi yarmida sekinlashgan va o‘tgan yilgi 13,9 foizdan 10,9 foizgacha tushdi. Oziq-ovqat mahsulotlarini ishlab chiqarishning yaxshilanishi oziq-ovqat narxining o‘sishini sekinlashtirishga yordam bergan, elektr va gaz uchun tariflar o‘zgarishsiz qolgan. Shu sabab OTB 2021 va 2022 yillar uchun inflatsiya prognozlarini mos ravishda 10 foiz va 9 foiz ko‘rsatkichlarda saqlab qoldi.

Avvalroq, OTB 2021 yilda O‘zbekistonda yalpi ichki mahsulot (YaIM) 4 foiz va 2022 yilda 5 foiz darajasida o‘sishini prognoz qilgandi.