Тошкент металлургия заводи Германия ва бошқа Европа мамлакатларига ўз маҳсулотларини экспорт қилишни бошлади

Иқтисодиёт 09:23 / 21.09.2021 13032

Ҳозирги кунда ТМЗ нафақат ички бозорда ўз позицияларини мустаҳкамлаш, балки ташқи савдода ҳам тажриба орттириш, ташқи бозорларни ривожлантириш бўйича самарали фаолият олиб бормоқда.

Завод ишлаб чиқараётган рух ва полимер қопламали металл лист маҳсулотларига бўлган талаб қўшни давлатларда жуда ҳам юқори бўлиб, улардан асосан қурилишда қўлланиладиган профнастил, металл черепица, ҳаво вентиляцияси элементлари, сендвич панел, букилган профил ва енгил қурилиш конструкциялари ишлаб чиқаришда хомашё сифатида фойдаланилади.

Шу йилнинг ўзида ТМЗ маҳсулотларини Россия, Қозоғистон, Қирғизистон ва Германияга экспорт амалиётини бошлади, Тожикистон, Туркманистон, Грузия ва Озарбойжон давлатлари билан музокаралар олиб борилмоқда ва шу билан бирга Европа (Австрия, Венгрия, Полша ва бошқа давлатлар) бозорларига маҳсулот экспорт қилиш бўйича талаблар ва шарт-шароитлар ўрганиб чиқилмоқда.

2021 йил 16-18 сентябр кунлари корхона ҳудудида бўлиб ўтган «ТМЗ ҳамкорларининг бизнес учрашуви» узоқ муддатли тижорат шартномаларининг имзоланишида муҳим аҳамият касб этди.

Форумда Россия, Украина, Тожикистон, Қозоғистон, Қирғизистон, Бирлашган Араб Амирликлари ва Германия каби Осиё ва Европа давлатларидан бир қанча етакчи компания вакиллари иштирок этишди.

Бундан кўзланган асосий мақсад дўстона учрашув бўлиб, 2022 йилга мўлжалланган ТМЗ ташқи савдо фаолиятини мукаммал йўлга қўйиш, потенциал ҳамкорлар билан бўладиган муносабатларни ривожлантириш стратегиясини тузиш, шунингдек, янги хорижий истеъмолчилар билан ўзаро манфаатли алоқаларни ўрнатишдир.

Бизнес семинарда меҳмонлар диққатига корхонанинг 2022-2023 йиллар учун ишлаб чиқилган тактик мақсад ва вазифалари ҳамда тижорат ва нарх сиёсати бўйича тақдимотлар ўтказилди.

Индивидуал учрашувлар ва музокаралар давомида 2021 йилдаги ҳамкорлик натижалари, шунингдек, тўғридан тўғри тижорат алоқаларини ривожлантиришнинг янги воситалари ва 2022-2023 йиллардаги ўзаро истиқболлари муҳокама қилинди.

ТМЗ Бош технологи ўринбосари Шерзод Фозилов айни пайтдаги ишлаб чиқариш жараёнлари ва истиқболли режалар ҳақида фикр билдирди:

«Заводимиз дунёнинг энг йирик металлургия ускуналари ишлаб чиқарувчилардан бири ҳисобланган Италиянинг «DANIELI» компанияси томонидан жиҳозланган. Замонавий заводнинг энг катта ютуқларидан бири «Яшил технология»лар асосида бунёд этилгани, яъни атроф-муҳитга зарари минимал даражага туширилганидир. Завод барча чиқиндиларни ўз ҳудудида қайта ишлайди. На ҳавога, на тупроққа ва на сувга зарарли моддаларни туширмайди. Кўпчилик Европа давлатлари ўзлари импорт қиладиган маҳсулотларнинг экологик тоза усулда ишлаб чиқарилганига катта урғу беришади. Шу сабаб чет давлатлардан ташриф буюрган меҳмонларни ишлаб чиқариш жараёнлари билан ҳам таништирдик. Хусусан, Германиядан келган ҳамкорлар заводдаги ҳолат билан танишиб, ҳамкорликни кенгайтириш бўйича таклифларни қўллаб-қувватлашди. Ишлаб чиқариш жараёнларига тўхталадиган бўлсак, ҳамма технологиялар автоматлаштирилган ва инсон омили камайтирилган. Корхонага кириб келган хомашёнинг сифатини назорат қилиб, қабул қилишдан тортиб, тайёр маҳсулотларни ишлаб чиқаришгача бўлган барча жараёнлар автоматлаштирилган технологиялар ва тизимлар орқали амалга оширилади».

ТМЗ сотув бўлими бошлиғи Ринат Габитов экспорт борасида қилинаётган ишларга тўхталиб ўтди:

«Ҳозирги вақтда заводда ишлаб чиқарилган маҳсулотларга Россия, Қозоғистон, Қирғизистон ва Тожикистон бозорларида талаб юқори. Йиллик ишлаб чиқарилаётган маҳсулотларнинг бир қисми ички бозорга чиқарилса, қолган қисмини четга экспорт қилиш режалаштирилган. Заводимиз янги бўлгани сабабли халқаро ҳамкорлик истиқболларини ўрганиш ва янги бозорлар топиш мақсадида бизнес форум ташкил қилдик.

Россиядан ташриф буюрган бир нечта савдо уйлари вакиллари, заводдаги ишлаб чиқариш жараёни, маҳсулотларнинг сифати билан батафсил танишишди. Яқин келажакда Россиядаги бу савдо уйлари воситачилигида маҳсулотларимизни Европанинг бошқа давлатларига сотиш ҳам кўзланмоқда. Улар ҳам ишлаб чиқариш жараёни билан танишишгандан сўнг маҳсулотларни бевосита ва ҳеч қандай иккиланишсиз реклама қила олишади», дейди мутахассис.

Тошкент металлургия заводининг тижорат масалалари бўйича директори Фаррух Мирзааҳмедов сўзларига кўра, тадбир иштирокчилари «ТМЗ ҳамкорларининг бизнес учрашуви» дўстона ва самарали муҳитда ўтганини ва бу форматдаги учрашувлар бугунги кунда жуда зарур ва долзарблиги ҳақида ўз фикрларини билдиришган. Сабаби бу турдаги тадбирлар Тошкент металлургия заводи билан мижозлар ва ҳамкорлар ўртасидаги ишончни мустаҳкамлаш ва шериклик муносабатлари ўрнатишга кўмаклашиш имконини беради.

Бизнес-семинардан сўнг меҳмонлар Тошкент шаҳри бўйлаб саёҳатга чиқишган. Тадбирнинг сўнгги кунида чет элдан келган меҳмонлар Самарқанд шаҳрига саёҳат қилишган. Шаҳар ўзининг тарихий обидалари, қадимий мақбара ва мадрасалари, диққатга сазовор жойлари билан унутилмас таассуротлар қолдиргани меҳмонлар томонидан эътироф этилган.

Кўпроқ янгиликлар