Тадбиркорларга солиқ имтиёзлари, экспорт борасида янгиликлар — ҳафта иқтисодий дайжести

Иқтисодиёт 18:03 / 12.09.2021 11267

Экспортчи корхоналарга енгилликлар берилди

“Экспортчи корхоналарни рағбатлантиришга оид қўшимча чора-тадбирлар тўғрисида” Ўзбекистон Республикаси Президентининг фармони қабул қилинди.

Унга мувофиқ, йиллик экспорт ҳажми 20 миллион доллардан ошган корхоналарга бир марталик молиявий ресурслар 5 млн доллар миқдорида тақдим этилади. Aйрим корхоналарга божхона тўловларини 120 кунгача кечиктириб тўлашга рухсат берилади. Aйрим маҳсулотлар импортида миллий сертификат олиш тартиби бекор қилинади.

«Фуқаролар ташаббуси» жамғармасига ҳаммаси бўлиб 292,2 млрд сўм маблағ йўналтирилди

Ташаббусли бюджетга аҳоли томонидан юборилган ташаббусларга овоз бериш якунланди, 205та туман ва шаҳарда жами 881та таклиф ғолиб деб топилди.

Фуқаролар юборган ташаббусларни молиялаштириш учун 292 млрд сўм маблағ ажратилди.

Ташаббусли бюджет: Чилонзор туман ҳокимлигига ошхона қуриш учун 1 млрд сўм ташаббуси муҳокамаларга сабаб бўлди

Тошкент шаҳар Чилонзор туман ҳокимлигига ошхона қуриш учун 999 млн сўм пул ажратиш таклифи “Ташаббусли бюджет” лойиҳасида ғолиб чиқди. Мавзу ижтимоий тармоқларда танқидларни келтириб чиқарди ва бу ташаббус учун пул ажратилмайдиган бўлди.

Молия вазирлиги ташаббуслар ижтимоий аҳамиятидан келиб чиқиб молиялаштирилишини маълум қилди.

Aвгустда бизнеснинг инфляцион кутилмалари ошди

Aвгустда аҳолининг инфляция бўйича кутилмалари 16 фоиз, бизнеснинг кутилмалари эса 16,1 фоизни ташкил этган. Июл ойида эса бу кўрсаткич, бизнесда 14,9 фоиз, аҳолида эса 16,1 фоиз бўлган.

Бунда бевосита июл ойида аҳоли сезган инфляция 16,4 фоиз, бизнес сезган инфляция эса 15,9 фоиз бўлганини таъкидлаш жоиз.

Ўзбекистонда табиий монополиялар сони биттага камайди

1 август ҳолатига кўра, Ўзбекистондаги табиий монопол корхоналар сони 129тани ташкил қилмоқда. Фарғонадаги “Қўқон иссиқлик энерго” МЧЖ реестрдан чиқарилди.

Марказий банк асосий ставкани йиллик 14 фоиз даражасида ўзгаришсиз қолдирди

9 сентябр куни Ўзбекистон Республикаси Марказий банки бошқарувининг навбатдаги йиғилиши бўлиб ўтди. Йиғилишда асосий ставкани ўзгаришсиз қолдириш тўғрисида қарор қабул қилинди.

Жорий йилнинг ўтган 8 ойида мамлакатда иқтисодий фаолликнинг жадаллашиши давом этиб, аксарият тармоқларда ўсиш кўрсаткичлари пандемиягача бўлган даражага етган.

Ёз ойларида мева-сабзавотлар нархи ва инфляция кутилган даражада пасаймади

2021 йилнинг август ойи якунлари бўйича йиллик инфляция уч-тўрт ойдан буён деярли ўзгаришсиз қолиб 11,1 фоиз даражасида – базавий прогноз кўрсаткичларидан бироз юқори шаклланмоқда.

Aвгуст ойи якунлари бўйича озиқ-овқат маҳсулотлари нархларининг йиллик ўсиши 15,5 фоизни ташкил этиб, умумий инфляцияга энг асосий оширувчи ҳисса қўшди. Таъкидлаш жоизки, ёз ойларида мева ва сабзавотлар нархлари ҳамда ойлик инфляция кўрсаткичларида кутилганидек мавсумий пасайиш суръатлари кузатилмади.

Тадбиркорларга солиқлар бўйича енгилликлар берилади

Президентнинг “Солиқ мажбуриятларини бажаришда тадбиркорлик субъектларига янада қулай шарт-шароитлар яратиш чора-тадбирлари тўғрисида”ги фармони қабул қилинди.

Фармонга кўра, 2022 йилдан бошлаб камерал солиқ текширувларда аниқланган камчиликлар учун жарима қўлланмайди, солиқ ҳисоботларини кечиктирганлик учун санкциялар ҳам бекор қилинади. Хоразмда ҳуқуқий эксперимент ўтказилиб, тадбиркорларнинг тўртта турдаги солиқ ҳисоботларини солиқ органлари ҳисоблаб беради.

Кўпроқ янгиликлар