«Янги пулли йўллар вақтни 4 соатдан 2 соатгача қисқартиради» — Шуҳрат Вафоев

Иқтисодиёт 18:09 / 01.09.2021 20186

Тошкентда бўлиб ўтаётган Ислом тараққиёт банки бошқарувчилар кенгаши йиғилишида иштирок этган Инвестициялар ва ташқи савдо вазирининг ўринбосари Шуҳрат Вафоев қурилиши режалаштирилаётган пулли йўллар ҳақида тўхталиб, янги йўллар минтақалар бўйича савдо нархини пасайтиришга ёрдам беришини айтиб ўтди.

«Биз хорижий сармоядорларга пулли йўллар қуриш учун иккита йўналишни, Тошкентдан Самарқандгача (305 км) ва Тошкентдан Андижонгача (340 км), таклиф қилишни режалаштирмоқдамиз. Тендер ҳужжатлари Жаҳон банки ва ЕТТБдаги ҳамкасбларимиз билан биргаликда тайёрланмоқда ва келгуси йилда савдоларни бошлашни режа қиляпмиз.

Умумий узунлиги қарийб 645 км бўлган янги йўллар вақтни 4 соатдан 2 соатга қисқартиради ва маҳаллий, минтақавий ва халқаро йўловчи ва юк ташиш учун ишлатилади.

Ушбу лойиҳаларни амалга ошириш минтақанинг транспорт инфратузилмасини яхшилайди ва минтақалар бўйича савдо нархини пасайтиришга ёрдам беради.

Хусусий сектор иштирокида ишлаб чиқилаётган ушбу ва бошқа лойиҳалар кучли иқтисодий ўсиш учун зарур бўлган инфратузилмани яратиш орқали ривожланишимизга катта ҳисса қўшади», деди Вафоев.

Шунингдек, мутахассис Masdar томонидан Ўзбекистонда қурилаётган қуёш фотоэлектр станцияларига ҳам тўхталиб, компания электр токини рекорд даражада паст нархларда, Самарқанд учун бир кВт соатини 1,79 цент, Сурхондарё лойиҳаси учун 1,80 цент ва Жиззах лойиҳаси учун 1,82 цент нархида етказиб беришга келишилганига ҳам урғу берди.

Кўпроқ янгиликлар