“10 минг долларлаб ойлик олади деган гапларни ҳам ўқидим” — Сардор Умурзаков ўзига юклатилган лавозимлар ҳақида

Иқтисодиёт 12:33 / 21.08.2021 23829

Kun.uz мухбири Инвестициялар ва ташқи савдо вазири билан суҳбатда унга топширилган вазифаларнинг ниҳоятда кўплиги ва бу борадаги муҳокамалар борасида савол берди.

“Биринчи савол: нечта жойдан ойлик оласиз демайсизми?! Биласизми, замонимизда ҳайп дейдими, маълумотларни охиригача ўрганмасдан сенсация қилиб тарқатиш кўпайган. Балки бу ҳам керакдир. Кимдир 15та лавозим деди, яна кимдир 10дан ошиқ деди, лекин менда лавозим битта. Бош вазирнинг инвестициялар ва ташқи масалалар бўйича ўринбосари – инвестициялар ва ташқи савдо вазири лавозимида бошқа вазирлар билан бир хил маош оламан.

Қолган лавозим деб айтилган ишлар қўшимча вазифа. Ҳозир ЖСТни муҳокама қилдик, Жаҳон савдо ташкилотига Ўзбекистоннинг кириши бўйича масалалар бир қанча вазирлик ва идораларга тааллуқли. Демак, бизда идоралараро майдонча бўлиши керак. Мана шунинг ролини идоралараро комиссия бошқаради. Унга раислик қилишим табиий, чунки ЖСТга Ўзбекистонинг аъзо бўлиши бизнинг вазирликка юклатилган. Бу комиссия лавозим эмас, қўшимча юклатилган вазифа.

Бундан ташқари, ҳукумат комиссияси бор: ташқи савдо, инвестициялар, маҳаллий саноатни ривожлантириш ва техник жиҳатдан тартибга солиш бўйича ҳукумат комиссияси дейилади.

Бу комиссия доирасида ҳудудларга чиқамиз ва у ҳам бевосита вазирлик ва менинг бош вазир ўринбосари сифатидаги вазифаларимга кирган масалаларни ҳал қилгани учун идоралар, ташкилотлар, банклар, маҳаллий ҳокимият органлари билан фаолиятларини мувофиқлаштириш мақсадида тузилган майдон. У асосий ишни амалга ошириш учун ёрдамчи платформа.

Кейин мен ўқидим: халқаро ташкилотлардаги бошқарувчи лавозимини эгаллайди, 10 минглаб доллар ойлик олади деган гапларни ёзишган экан. Лекин ундай эмас. Инвестициялар ва ташқи савдо вазирлиги ҳукуматимизда халқаро молиявий ташкилотлар билан асосий муносабатларни тартибга солувчи орган ҳисобланади. Халқаро молия ташкилотларидан Ўзбекистон нафақат маблағ олади, балки уларда Ўзбекистон ҳам акционер ҳисобланади, кичик бўлса ҳам улуши бор. Бизнинг вазифамиз киритган улушимиздан 100-200 карра кўп инвестицияни Ўзбекистонга жалб қилиш. Aкционер сифатида ўз ҳуқуқларимизни ҳимоя қилишимиз керак. Шу сабабли ҳар битта давлатдан бошқарувчи тайинланадиган бошқарув кенгаши энг олий орган ҳисобланади. Ўзбекистондан бошқарув кенгашига мен аъзоман, чунки вазирлик шу масалаларга жавоб беради. Бу вазифага ҳам ҳеч қандай ойлик тўланмайди.

Кимдир айтади, бу инсофсиз экан, 15та одам ишлаши керак бўлган жойни эгаллаб олган. Бу битта лавозимда ишлаганда яна 14та одам ишли, ойликли бўларди дейди. Марҳамат, бу ишлар учун ойлик йўқ, ким хоҳласа ишлаб кўрсин”, — деди вазир.

Сардор Умурзаков билан тўлиқ интервьюни бу ерда кўриш мумкин.

Кўпроқ янгиликлар