Tokio-2020 kundaligi: Birinchi kunda o‘zbekistonlik sportchilarning barchasi muvaffaqiyatsizlikka uchradi

Sport 19:14 / 24.07.2021 41588

Birinchi kundagi musobaqalarda ishtirok etgan 11 sportchining aksari turnir bilan erta xayrlashdi. Ayniqsa, dzyudochi Sharofiddin Lutfullayev, bokschi Sanjar Tursunov hamda tennischi Denis Istomin birinchi kundayoq turnirdagi ishtirokini to‘xtatishi kutilmagan holat bo‘ldi.

O‘q otish

Avvaliga Toshkent vaqti bilan tong sahar 04:30da 10 metrdan miltiqdan o‘q otish bo‘yicha Muxtasar Tohirova ishtirokini boshladi. Saralashda 622,2 ochko to‘plagan Muxtasar 50 sportchi ichida 33-o‘rinni oldi va saralashdan o‘ta olmadi. Kvalifikatsiyada eng yaxshi 8 o‘rinni qo‘lga kiritgan sportchilar finalga chiqishdi.

Tokio olimpiadasining ilk medali ham aynan shu sportda o‘z egasini topdi. Xitoylik Yang Kian oltin medalni qo‘lga kiritdi. O‘zbekistonlik Muxtasar Tohirovada olimpiada sovrindori bo‘lish uchun hali imkoniyat bor. U 31 iyul kuni 50 metrdan o‘q otish bo‘yicha musobaqalarda ishtirok etadi.

Qilichbozlik

Qilichbozlarimiz uchun ham bugungi kun muvaffaqiyatsiz kechdi. Shpaga yo‘nalishida 1/32 finalda ishtirok etgan O‘zbekiston milliy jamoasi vakili Malika Hakimova xitoylik Yiven Sunga 10:15 hisobida imkoniyatni boy berdi. Erkaklar o‘rtasida musobaqalarda qatnashgan Sherzod Mamutov sablya yo‘nalishida ruminiyalik Yulian Teodosiuga 11:15 hisobida mag‘lub bo‘ldi.

Eshkak eshish. Imkoniyat saqlab qolindi

Akademik eshkak eshish bo‘yicha 2000 metrga o‘tkazilgan bahslarda o‘zbekistonlik sportchilar ham qatnashdi. Sobirjon Safaraliyev va Shahboz Xolmirzayev juftlik bahslarida 6 jamoa ichida marraga to‘rtinchi bo‘lib yetib bordi. Endilikda o‘zbekistonlik sportchilar keyingi bosqichga chiqish uchun o‘tish o‘yinlarida ishtirok etadi. Ya'ni ularda medallar uchun kurashish imkoniyati saqlanib qoldi.

Dzyudo

Olimpiadaga to‘liq tarkibda (11 kishi) yo‘l olgan dzyudo jamoasi ham mag‘lubiyat bilan boshladi. -60 kg vazn toifasida Sharofiddin Lutfullayev ukrainalik Artyom Lesyukka yutqazib, musobaqani tark etdi.

Boks. Kutilmagan mag‘lubiyat

Boks bahslari ham o‘zbekistonlik sportchilar uchun yomon boshlandi. Ayollar o‘rtasidagi -69 kg vazn toifasida janglarda qatnashgan Shahnoza Yunusova birinchi bosqichda polshalik Yevropa chempioni Karolina Kojyevskaga mag‘lub bo‘ldi. 3 raundlik jang 5:0 hisobida polshalik sportchi foydasiga hal bo‘ldi.

 

Erkaklar musobaqalarida ham janglar mag‘lubiyat bilan boshlandi. -91 kg vaznda ringga chiqqan Sanjar Tursunov kutilmaganda o‘zidan 12 yosh katta jazoirlik Abdulhafid Benshalaga 1:4 hisobida mag‘lub bo‘ldi.

Tennis. Denis erta yakunladi

O‘zbekistonning birinchi raketkasi Denis Istomin ham musobaqani erta yakunladi. O‘zining eng yaxshi holatida bo‘lmagan Istomin reytingda o‘zidan (197-o‘rin) 37 pog‘ona yuqorida bo‘lgan (160-o‘rin) hindistonlik Sumit Nagalga uch setda imkoniyatni boy berdi – 4:6, 7:6, 4:6. Ikkinchi setda Istomin kambek qilgandi, biroq bu unga g‘alaba uchun yetarli bo‘lmadi.

Velosport. Xolmurodov marraga yetib bordi

Velosportchimiz Murodjon Xolmurodov 132 sportchi orasida 64-bo‘lib marraga yetib bordi. Bu musobaqalarda hamma ham marraga yetib boravermaydi. Murodjon 234 km masofani 6 soat 21,46 daqiqada bosib o‘tdi.

Sport gimnastikasi

Rasuljon Abdurahimov Sport gimnastikasining ko‘pkurash yo‘nalishi bo‘yicha ham Tokio-2020 doirasida ishtirokini yakunladi.

U tayanib sakrashda 13.833, parallel to‘sinda 14.733, turnikda 13.033, erkin mashqda 12.566, sport otida 12.166, halqada 12.733, jami 79.064 ball to‘pladi, ammo uning natijasi final yo‘llanmasi uchun yetarli bo‘lmadi - 49 o‘rin.

«Qayd etilgan natijalardan shunday xulosa qilish mumkin: vakillarimizni hayajon qiynab qo‘ymoqda yoki kecha bo‘lib o‘tgan ochilish marosimi ularni ancha toliqtirib qo‘ygan. Umid qilamizki, ertadan g‘alabali onlarimiz boshlanadi», deyiladi vazirlik xabarida.

Sport jurnalisti, ekspert Azamat Murodovning fikricha, hozircha, O‘zbekiston terma jamoasining yetakchi, medalga da'vogar bo‘lgan sportchilari o‘z ishtiroklarini boshlashgani yo‘q. U keyingi kungi musobaqalarda ishtirok etadigan o‘zbekistonlik sportchilarga omad tilab, ular g‘alaba qozona boshlashiga ishonch bildirgan.

Ko‘proq yangiliklar: