Samarqand tumanida tadbirkorga yer olib berishni va'da qilib 10 ming AQSh dollari olgan shaxsga jinoiy ish qo‘zg‘atilgan. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar bermoqda.

Ma'lum qilinishicha, Bosh prokuratura huzuridagi departamentning Samarqand tuman bo‘limi tomonidan o‘tkazilgan tergovga qadar tekshiruvda, fuqaro F.M. ushlangan. U, go‘yoki o‘zini hokimlik idoralarida ishlashini aytib, tuman hududidan ishlab chiqarish sexi qurish uchun 1 gektar yer olib berishni va'da qilib, tadbirkor A.dan 10 ming dollarni firibgarlik yo‘li bilan olgan.

Qayd etilishicha, F.M. tadbirkordan olgan 10 ming dollar hisobidan 5 ming dollarni o‘z ixtiyori bilan qaytargan va bu protsessual tartibda rasmiylashtirilgan.

Ta'kidlanishicha, mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.