900dan ziyod oziq-ovqat mahsulotlari uchun qayta sertifikatlash tizimi tugatiladi. Bundan tashqari, deklaratsiyalash mexanizmini amaliyotga qo‘llash orqali korxonalar o‘zlari ishlab chiqargan bir qancha mahsulotlarining sifati va xavfsizligiga o‘zlari kafolat beradi.
Investitsiya va tashqi savdo vazirligida Texnik jihatdan tartibga solish agentligining tuzilishi va sohada amalga oshirilishi kutilayotgan o‘zgarishlarga bag‘ishlangan matbuot anjumani o‘tkazildi.
Yangi tuzilgan agentlik direktori Dilshod Sattorovning ta'kidlashicha, bir qancha mahsulotlarga takroriy sertifikatlash talablari bekor qilinmoqda.
«Bugungi kungacha mavjud bo‘lgan oziq-ovqat va qishloq xo‘jaligi mahsulotlariga takroriy sertifikatlashni talab etadigan me'yor va talabning bekor qilinishi 900dan ziyod oziq-ovqat mahsulotlari uchun qayta sertifikatlashni tugatmoqda. Bundan keyin ushbu mahsulotlar sanitariya-epidemiologiya nazoratidan o‘tganidan keyin iste'molga chiqishi ko‘zda tutilmoqda. Qolgan laboratoriya yoki idoralararo sinov sertifikatlash tizimlari talab etilmaydi.
O‘tgan 2020 yilda 157 mingta shunday sertifikatlar taqdim qilingan bo‘lsa, joriy yilda bu raqamlar 60 mingtagacha kamayadi.
Bundan tashqari deklaratsiyalash mexanizmini qo‘llash amaliyotga tatbiq qilinmoqda. Oldinlari bu jarayonda faqatgina sertifikatsiyalash tizimi qo‘llab kelingan. Endilikda korxonalar o‘zlari ishlab chiqargan mahsulotlarining sifati va xavfsizligiga o‘zlari kafolat beradi. Bu tadbirkorlarga berilayotgan qulaylik va ishonch hisoblanadi. Shuningdek, uchinchi tomon hisoblangan sertifikatsiyalash idoralaridan takroriy sinovlarni o‘tkazish talab etilmaydi.
Buning natijasida sertifikatlashadigan mahsulotlarning miqdori 540 taga kamayadi. Bu tadbirkorlar tomonidan qilinadigan sarf-xarajatlarning ham kamayishiga olib keladi», deya ta'kidladi Dilshod Sattorov.
Avvalroq, «O‘zstandart» agentligi tugatilib, uning funksiyalari Investitsiyalar va tashqi savdo vazirligi huzuridagi yangi Texnik jihatdan tartibga solish agentligiga o‘tkazilganligi xabar qilingandi.
