Samarqand viloyatida joylashgan YPX maskanida haydovchi YPX inspektoriga hujjatlarni taqdim etmagan. O‘z navbatida YPX inspektori ham haydovchiga xizmat guvohnomasini ko‘rsatmagan. O‘rtada tortishuv bo‘lib o‘tgan. Ularning xatti-harakatiga huquqiy baho beriladi. Bu haqda viloyat IIB YHXB xabar bermoqda.

Ma'lum qilinishicha, bundan bir necha kun oldin ijtimoiy tarmoqlarda o‘zaro tortishayotgan va bir-biriga hujjat ko‘rsatmayotgan YPX xodimi va haydovchi o‘rtasidagi tortishuv tasvirlangan video tarqaldi. Aniqlanishicha, mazkur hodisa Samarqand viloyati Urgut tumanida joylashgan «Omon Qo‘ton» YPX maskanida sodir bo‘lgan.

Qayd etilishicha, YPX inspektori safdor O.Ortiqov yo‘riqnoma asosida M-39 xalqaro avtomobil yo‘lining 1119-kilometrida joylashgan «Omon Qo‘ton» YPX maskanida hizmat olib borayotganda Lada Vesta avtomashinasi haydovchisini quvib o‘tish qoidalarini buzganligi uchun to‘xtatgan.

U tegishli hujjatlarini taqdim qilishni so‘raganida haydovchi YPX inspektoridan o‘zini tanitishini va xizmat guvohnomasini ko‘rsatishini, shundan so‘ng tegishli hujjatlarni berishini aytadi. Shu tariqa o‘rtada tortishuv kelib chiqadi. YPX inspektori xizmat guvohnomasini ko‘rsatishdan bosh tortadi. Haydovchi esa unga tegishli hujjatlarni bermaydi.

Ta'kidlanishicha, xodim va haydovchi o‘rtasidagi to‘liq muloqot inspektorning Body kamerasida qayd etilgan. YPX xodimi va haydovchi o‘rtasidagi muloqot yuzasidan Samarqand viloyati IIB YHXB tomonidan xizmat tekshiruvi tayinlangan.

Viloyat IIB YHXB axborot xizmatiga ko‘ra, YPX xodimi bilan tortishgan ushbu haydovchi so‘nggi 1 yil mobaynida 4 marotaba yo‘l harakati qoidalari bilan bog‘liq qoidabuzarliklar sodir etgan.