«Kabar» axborot agentligining xabar berishicha, birinchi vaksinalar Qirg‘iziston sog‘liqni saqlash va ijtimoiy rivojlanish vaziri Alimqodir Beyshenaliyev va uning o‘rinbosarlari tomonidan qabul qilingan.

Qirg‘iziston sog‘liqni saqlash vaziri brifingda Xitoy vaksinasining samaradorligi yuqori va hech qanday nojo‘ya ta'sirlarni keltirib chiqarmaganini aytib o‘tgan.

Emlash ikki marta, 25—28 kun oralig‘ida amalga oshirilishi ko‘zda tutilgan.

Qirg‘iziston immunoprofilaktika markazi direktori Gulbara Ishenapisovaning ma'lum qilishicha, emlashning birinchi bosqichida Xitoyning «SinoPharm» vaksinasi bilan 75 ming kishi emlanadi.

Uning so‘zlariga ko‘ra, 19 mart kuni Xitoydan 150 ming doza vaksina mamlakatga olib kelingan.

«Emlashning birinchi bosqichida intensiv terapiya bo‘limlari shifokorlari, tez yordam xodimlari va epidemiyada ish olib borayotgan epidemiologlar emlanadi. Shuningdek, emlash o‘qituvchilar, bojxona va ichki ishlar xodimlari orasida ham amalga oshiriladi», — dedi Gulbara Ishenapisova.