Видео: Букланиб, пол остига жойлашадиган телевизор тақдим этилди

Фан-техника 19:48 / 28.03.2021 26022

Шундай истеъмол товарлари борки, улар замонавий илмий-техник тафаккурнинг инъикоси бўлиб туради. Нархи қанча бўлишидан қатъи назар, уларда ихтирочилар ва конструкторларнинг энг янги ва ноодатий ғоялари амалга оширилади.

Австриянинг C SEED Entertainment компаниясининг 165″ телевизори ҳам шундай товарлардан биридир. Бу ҳашаматли қурилма роса 10 сонияда полдан ўсиб чиқади, сассиз жимжимадор устун пайдо бўлади ва қаршингизда катта ва сифатли экран пайдо бўлади.

C SEED Entertainment компанияси Венада жойлашган ва АҚШнинг Калифорния штати Беверли-Ҳиллз шаҳрида филиали бор. Жаҳонга машҳур Bang & Olufsen’нинг собиқ ходимлари асос солган компания 2013 йилда ўзининг илк маҳсулотини намойиш қилиб, тантанали равишда C SEED телевидение олами тарихини ўзгартириб юборганини эълон қилди.

165″ M1 модели ёпиқ иншоотларда фойдаланишга мўлжалланган ва 2021 йилнинг учинчи чорагидан бошлаб мижозларга тўлиқ ўрнатилган ҳолда топширилади. Экран 4К форматда ишлайди ва қурилма тўлиқ очилганидан кейин чоксиз бирлашадиган 5та MicroLED панелдан иборат.

«C SEED M1 бу назокатнинг рўёбга чиқишидир. Бир тугмани босиш билан пол очилади ва бир неча сония ўтиб ердан алюминийдан ишланган силлиқ устун чиқиб келади. Деворга илинадиган катта телевизион экранлар замонавий интерьер дизайнда эскирди. Шунинг учун C SEED компанияси мутлақо бошқа йўлдан юриб, инқилобий дизайн яратди», дейишди фахр билан муаллифлар.

Умуман олганда, М1 бу уникал, сифатли улкан телевизор бўлиб, тезда пол остига яширина олади. Оддий комплектацияда олтин, қора ва титан ранглардан бирини танлаш мумкин. Мижоз талабига кўра телевизор корпусига ҳам буюртма бериш мумкин.

Албатта бундай телевизор учун муносиб хона кераклиги ҳам ойдек равшан. Телевизор нархини эса «чўнтакбоп» деб бўлмайди. Беверли-Ҳиллзда яшовчи мультимиллионерларга мўлжалланган бу каби телевизорларнинг базавий нархи «атиги» 400 минг доллардан бошланади.

Кўпроқ янгиликлар