Qayd etilishicha, «Obod qishloq» va «Obod mahalla» dasturlarini amalga oshirish bo‘yicha vazifalar muhokama qilinayotgan mazkur yig‘ilishda Samarqand viloyati Payariq tumani misolida joriy yilda bu borada amalga oshiriladigan ishlar haqida ma'lumot berilgan.

Ma'lum bo‘lishicha, tumanda 145 kilometr yo‘l, ming kilometr elektr tarmog‘i, 250 ta transformator va 54 kilometr ichimlik suvi tizimi yaroqsiz ahvolga kelgan. Ijtimoiy soha obektlarida ham ko‘plab muammolar bor.. Tumanda 9 ming nafardan oshiq ishsiz bor. Mingta oila «temir daftar»ga, 6 ming nafar aholi «yoshlar daftari»ga, 2 200 nafar xotin-qizlar «ayollar daftari»ga kiritilgan.

Videoselektor yig‘ilishida ta'kidlanishicha, joriy yilda Samarqand viloyatida 717 ta qishloq va 198 ta shahar mahallalari, jumladan, Payariq tumanidagi 56 ta qishloq qiyofasi zamonaviy ko‘rinishga keltiriladi va infratuzilmasi yaxshilanadi hamda aholi bandligini ta'minlash ishlari amalga oshiriladi. Bu maqsadlarga 1,6 trillion so‘m yo‘naltirish rejalashtirilgan.

Yig‘ilishda Samarqand viloyati hokimi E.Turdimov mavzu yuzasidan hisobot bergan.