Хитойнинг Pinduoduo онлайн-ритейлери фойдаланувчилар сони бўйича Alibaba’дан ўзиб кетди

Фан-техника 01:23 / 18.03.2021 8121

Хитойнинг Pinduoduo онлайн-ритейлери фойдаланувчилари сони бўйича Alibaba интернет-гигантини ортда қолдириб, бу кўрсаткич бўйича Хитойда 1-ўринга чиқиб олди.

Pinduoduo’нинг 2020 йил учун тақдим қилган молиявий ҳисоботида кўрсатилишича, ритейлернинг фаол фойдаланувчилари сони 788,4 млн нафарга етган. Alibaba’да эса бу кўрсаткич  779 млн фойдаланувчини ташкил қилмоқда.   
        
Компания тушуми бир йил ичида 97 фоизга ўсиб, 59,5 млрд юанга (9,1 млрд доллар) етган. Соф зарари 2019 йилга нисбатан 10,5 фоизга ортиб, 9,4 млрд юанни (1,4 млрд доллар) ташкил қилган. Шу билан бирга, Pinduoduo акциялари нархи 17 мартдаги савдолар вақтида 7 фоизга тушиб кетган ва бу биринчи навбатда компания директорлар кенгаши раиси лавозимидан унинг асосчиси Колин Хуан кетиши эълон қилингани билан боғланган. Хуан ўз лавозимини тарк этиши Хитой ҳукумати маҳаллий технологик тармоққа босимни кучайтираётган вақтда юз бермоқда. Айниқса бу босимга ҳаммадан кўпроқ Alibaba тўқнаш келди. Март бошида Хитой мутасадди органлари Pinduoduo’ни Хитойнинг бошқа ритейлерлари қатори антимонопол қоидаларни бузганлик учун жаримага тортган.

Pinduoduo’нинг Хуан томонидан 2015 йилда асос солинган бизнес-модели рақобатчилари – Alibaba ва JD.com’никидан фарқ қилади. Унда фойдаланувчилар харидлар амалга ошириши ҳамда дастурдаги онлайн-ўйинлар босқичларини ўтиш орқали ҳам чегирмалар олиши мумкин.

Дастлаб онлайн-ритейлер мева ва қишлоқ хўжалиги маҳсулотларини сотишга ихтисослашган бўлган. Бироқ кейинроқ бошқа онлайн-ритейлерлар каби кенг турдаги товарларни – кундалик эҳтиёждаги озиқ-овқат маҳсулотлари ва товарларидан тортиб техника ва мебелгача сота бошлаган. 

Pinduoduo’нинг асосий акциядорларидан бири Хитойнинг Tencent интернет-корпорацияси ҳисобланади.

Кўпроқ янгиликлар