Buyuk Britaniyada tibbiy tadqiqot doirasida ko‘ngillilarga koronavirus yuqtirilmoqda. Virusning inson organizmiga ta'sirini o‘rganish dasturi boshlangani haqida Britaniya sog‘liqni saqlash vazirligiga tayanib DW xabar qildi.

Xabarga ko‘ra, gap dunyoda ilk bor odamlarga maqsadli ravishda koronavirus yuqtiriladigan tadqiqot to‘g‘risida bormoqda. Mamlakat sog‘liqni saqlash vazirligining bildirishicha, tadqiqotdan maqsad, koronavirusga qarshi vaksina ishlab chiqilishini yaxshilash va tezlashtirishdir.

 Ko‘ngillilarning birinchi guruhi bilan Londondagi Royal Free Hospital klinikasi mutaxassislari ishlamoqda.

 Olimlar inson immun tizimi SARS-CoV-2 virusiga qanday javob qaytarishini va bemor virusni atrofidagilarga qanday yuqtirishini o‘rganishmoqchi.

Xabarda aytilishicha, tadqiqotda ishtirok etish uchun yosh va sog‘lom insonlar tanlab olingan. Ular organizmiga virusning juda kam dozasi kiritiladi.