Байденнинг АҚШ Конгрессидаги партиядоши Сурияга зарба бериш қарорини қоралади

Жаҳон 00:44 / 27.02.2021 7727

Калифорниялик демократ Ро Ханнанинг айтишича, АҚШ президенти бундай қарорларни қонун чиқарувчиларга мурожаат қилмасдан уларнинг розилигисиз қабул қилмаслиги керак.

Суриянинг Дайр-аз-Зор вилоятидаги Ироққа қўшни ҳудудларга АҚШнинг ҳаво ҳужумлари уюштиришига ҳеч қандай асоси йўқ эди. Бу ҳақда АҚШ Конгресси Вакиллари палатаси аъзоси, Калифорния штати демократи Ро Ханнанинг 26 февралдаги ёзма баёнотида айтилган.

“Бу қарори билан Жо Байден Яқин Шарқда зарба беришни буюрган АҚШнинг еттинчи президентига айланди. Президентнинг Конгресс маъқулламаган ҳолда “яқинлашаётган таҳдидга қарши ўзини ҳимоя қилиш” деб ҳисобланмайдиган ҳарбий ҳужумни санкциялашига мутлақо асос йўқ эди. Биз Яқин Шарқда вазиятни оғирлаштиришимиз эмас, у ердан чиқиб кетишимиз лозим”, дея таъкидлади демократ.

Ханнанинг таъкидлашича, Америка президенти “қонун чиқарувчиларнинг тўғридан тўғри маъқуллашисиз бундай ҳаракатларни қилмаслиги керак” ва бу масалада эскирган маълумотларга таянмаслиги лозим.

“Мен 45-президент Доналд Трамп даврида ҳам бу тугамайдиган урушга қарши чиқдим ва ҳозирги демократ президент даврида ҳам унга қарши чиқаман”, деди конгрессмен.

“Биз Яқин Шарқдаги можароларни авж олдиришга эмас, балки урушларни тугатишга интилдик. Бизнинг ташқи сиёсатимиз дипломатия ва қонун устуворлигига асосланган бўлиши керак, Конгресс маъқулламаган ҳолда қасоскор ҳаво ҳужумларига эмас”, деб хулоса қилган демократ.

Кўпроқ янгиликлар