Франциянинг собиқ президенти Валери Жискар д'Эстен 3 декабрга ўтар кечаси 95 ёшида вафот этди. Бу ҳақда France-Presse ахборот агентлиги сиёсатчининг оиласига таяниб хабар берди. 

Собиқ президент Луар ва Шер департаментидаги уйида коронавирус инфекцияси асоратлари оқибатида вафот этган.

“Жискар д'Эстен 2 декабрда Луар ва Шер департаментидаги уйида вафот этди. Унинг ўлими саломатлиги кескин ёмонлашгани сабабли юз берди, у коронавирусдан вафот этди”, деб маълум қилган марҳумнинг оиласи. 

Таъкидланишича, марҳумнинг истагига кўра, унинг дафн маросими оила даврасида бўлиб ўтади. 

Маълум қилинишича, Жискар д'Эстен ноябрда юрак етишмовчилиги билан шифохонага ётқизилган. Кейинроқ собиқ президент соғайиб кетиб, шифохонадан чиқарилган.

Марҳум сиёсатчи Иккинчи жаҳон уруши вақтида Парижни озод этиш учун жангларда иштирок этган. Францияни урушдан кейинги йиллар бошқарган генерал Шарл де Голл ҳукуматида вазир лавозимини эгаллаган.

Жискар д'Эстен Франция президенти лавозимини 1974 йил май ойидан 1981 йил май ойигача эгаллаган. 1981 йилда иккинчи муддатга сайловларда иштирок этганда Франсуа Миттерандан мағлубиятга учраган.  

Жискар д'Эстен президентлиги вақтида сайловда иштирок этиш ёшини 18 ёшга туширган, ажримлар жараёнини соддалаштирган, никоҳсиз туғилган фарзандлар ҳуқуқларини кафолатлаган. У, шунингдек, кейинчалик “Катта еттилик” пайдо бўлишига олиб келган 5та ривожланган давлат – АҚШ, Япония, Германия, Британия ва Франция етакчилари учрашуви ташаббусчиси бўлган.