АҚШ Тайвань билан ҳамкорликни кенгайтирмоқда

Жаҳон 02:16 / 22.11.2020 3531

АҚШ Тайвань билан иқтисодий ҳамкорликни ошириш учун 5 йилга мўлжалланган мулоқот режасини ишлаб чиқмоқчи. Бу ҳақда The Guardian ёзмоқда.

«АҚШ-Тайвань иқтисодий фаровонлиги бўйича шериклик мулоқоти» деб номланажак келишувга мувофиқ, томонлар ҳар йили ахборот хавфсизлиги, яримўтказгич ишлаб чиқариш, инвестиция, фан ва технологиялар соҳасида ҳамкорликни такомиллаштириш бўйича учрашувлар ўтказади.

Тайвань ташқи ишлар вазири Жозеф Ву мулоқотлардаги бу янги қадамни муҳим воқеа деб атади. АҚШнинг Тайвандаги дипломатик вакили бўлган Тайпей-Америка институти директори Брент Кристенсен эса ушбу келишув АҚШ-Тайвань алоқалари ​​ривожланиб бораётганидан далолат беришини таъкидлаган.

АҚШ ва Тайвань ўртасидаги келишув оролни ўз ҳудуди деб биладиган Хитойнинг салбий реакциясига сабаб бўлиши кутилмоқда. Хитой Ташқи ишлар вазирлиги матбуот котиби Ван Винбин АҚШ ва Тайвань ўртасидаги иқтисодий мулоқот учрашувини қоралаб, Вашингтонни Тайвань билан ҳар қандай расмий алоқани тўхтатишга чақирган.

Маълумот учун, АҚШ атроф муҳитни муҳофаза қилиш агентлиги раҳбари Эндрю Уилер 20 декабрда Тайванга ташриф буюриши кутилмоқда. Хитой эса бу ташриф амалга ошса, АҚШга қарши чора кўришини маълум қилган.

Кўпроқ янгиликлар