Украинада «5та муҳим масала» юзасидан жамоатчилик фикри сўровномаси ўтказилади. Муҳим масалалардан бири – каннабисни қонунийлаштириш

Жаҳон 13:14 / 17.10.2020 4060

Маълум қилинишича, украинларга жавоб бериш таклиф қилинган сўровномада парламент таркиби, тиббий каннабис ўсимлиги истеъмолини қонунийлаштириш ва Будапешт келишуви шартларини бажариш ҳақида саволлар бўлади.

Будапешт меморандуми – 1994 йилда Венгрия пойтахти Будапешт шаҳрида Украина, Россия, АҚШ ва Буюк Британия томонидан имзоланган ҳужжат. Келишувга кўра, Украина ўз хоҳиши билан ядро қуролидан воз кечиши ҳамда бошқа давлатлар унинг ҳудудий яхлитлиги ва суверенитетини ҳурмат қилиш шартини бўйнига олган эди.

Аввалроқ, Зеленский эълон қилган сўровноманинг иккита саволи коррупция ҳолатлари учун умрбод қамоқ жазосини жорий қилиш ва Донбассда эркин иқтисодий ҳудуд ташкил қилиш ҳақида бўлган.

Украина президенти «5та муҳим масала» юзасидан жамоатчилик фикри умумукраин сўровномаси ўтказилишини тўғридан-тўғри демократиянинг кўриниши деб атади. 

«Ахир биз мустақиллик тарихимизда илк маротаба «Сен нима деб ўйлайсан? Нима учун сенинг жавобинг муҳим? Нега айнан сен айтганингдек бўлади, чунки Украина бу – сенсан!» – деган саволларни қўйдик», дейди Зеленский.

Ўз ичига сўровномаларни ҳам қамраб олган маҳаллий сайловлар 25 октябрь куни бўлиб ўтади. Лекин, сўровнома натижалари ҳеч қандай ҳуқуқий оқибатлар келтириб чиқармайди.

Кўпроқ янгиликлар