Рафаэль Надаль Roland Garros’нинг 13 карра ғолиби бўлди 

Спорт 22:47 / 11.10.2020 2994

Надаль мусобақанинг ҳал қилувчи учрашувида жаҳоннинг биринчи рақамли теннисчиси, сербиялик Новак Жоковични 6:0, 6:2, 7:5 ҳисобида мағлуб этди. Учрашув 2 соат 43 дақиқа давом этган.

Таъкидлаб ўтиш жоиз, Надаль ва Жокович Париждаги мусобақа финалида учинчи марта учрашишди, бироқ ҳар сафар испаниялик теннисчининг қўли баланд келган.

Испаниялик теннисчи бежиз “тупроқли кортлар қироли” деб аталмайди: Парижнинг тупроқли кортларида ўтувчи турнирни бунча кўп марта ҳали ҳеч бир теннисчи ютмаган. У бунгача Roland Garros’да 2005, 2006, 2007, 2008, 2010, 2011, 2012, 2013, 2014, 2017, 2018 ва 2019 йилларда ғалаба қозонган.

Яна бир эътиборли жиҳати, Надалнинг финалдаги ғалабаси унинг Франция очиқ чемпионати учрашувларидаги 100-ғалабаси бўлди. Бундан ташқари, испаниялик спортчи “Катта дубулға” сериясига кирувчи 20-мусобақасида ғалаба қозонди ва бу натижа билан швейцариялик теннисчи Рожер Федерер рекордини такрорлади.

Аёллар ўртасида эса 19 ёшли польшалик Ига Швентек зафар қучди. Бу ғалаба ёш теннисчининг ушбу мусобақадаги биринчи ғалабаси ҳисобланади. Швентек финал учрашувида америкалик София Кенинни мағлубиятга учрата олган.

Roland Garros 2020 йилги “Катта дубулға” мусобақаларига якун ясади. Жорий йилда ушбу серияга кирувчи Уимблдон турнири пандемия сабабли ўтказилмади.

Кўпроқ янгиликлар