APL: «London derbisi», «Liverpul» - «Lids», Mourino Anchelottiga qarshi
Tumanli Albionda mavsumning starti Manchester klublarisiz boshlansa-da, dastlabki tur doirasida intrigalar yetarlicha. Chempionatning ilk o‘yini - «London derbisi». «Arsenal» «Kreyven Kottej»da «Fulhem»ga qarshi maydonga tushadi. Ha, o‘sha britancha an'analarni saqlab qolgan, dalahovlilar orasidagi mo‘'jazgina stadionda o‘tadi bu to‘qnashuv. APLni sog‘inib qolgan debyutant klub yaqinda Angliya Superkubogini qo‘lga kiritgan Mikel Arteta jamoasiga qarshi jiddiy qarshilik ko‘rsatishi kutilmoqda. Futbol kunini ushbu to‘qnashuvni tomosha qilish bilan boshlaymiz.
Yoki olaylik, Yurgen Klopp boshchiligidagi «Liverpul»ning Marselo Belsaning «Lids»iga qarshi azaliy raqiblarning bahsi zerikarli bo‘lishi mumkinmi? Aslo yo‘q. Premer-ligadagi bu qarama-qarshilikni 16 yildan buyon kutganlar bor.
Transfer oynasida faol bo‘lgan «Everton» Londonda «Tottenhem» sinovidan qanday o‘tishi ham barchaga qiziq bo‘ladi. Har holda Anchelotti va Mourinoning bir necha yillik hisob-kitobi bor. Qolaversa, o‘tgan mavsum top to‘rtlikda bo‘lgan «Lester» va «Chelsi»ning mavsumni qanday boshlashi barcha uchun qiziq bo‘lishi shubhasiz. Ayniqsa, transfer oynasida katta xarajatlarga qo‘l urgan Lempardning chempionlik uchun kurashdagi dastlabki imkoniyatlari ko‘rina boshlaydi.
Angliya Premer-ligasi. 1-tur
12 sentabr (shanba)
16:30. Fulhem – Arsenal
TV-translatsiya: FutbolTV
19:00. Vest Hem - Nyukasl
19:00. Kristal Pelas - Sauthempton
21:30. Liverpul - Lids
TV-translatsiya: FutbolTV
13 sentabr (yakshanba)
18:00. Vest Bromvich – Lester
TV-translatsiya: FutbolTV
20:30. Tottenhem – Everton
TV-translatsiya: UzReportTV
14 sentabr (dushanba)
23:55. Brayton – Chelsi
TV-translatsiya: FutbolTV
23:55. Sheffild Yunayted - Vulverhempton
Qoldirilgan. Bernli - Manchester Yunayted
Qoldirilgan. Manchester Siti - Aston Villa
Ispaniya: «Valensiya derbisi» va boshqa o‘yinlar
APL bilan bir kunda La Liga karvoni ham yo‘lga otlanadi. Ispaniyada ham yevrokuboklardagi ishtiroki uchun qo‘shimcha ta'til berilgani sababli «Real», «Barselona», «Atletiko» va «Sevilya» singari grandlar ishtirokidagi o‘yinlar dastlabki tur doirasidan boshqa sanaga ko‘chirilgan. Shunga qaramay, La Ligada jangovar o‘tishi kutilayotgan derbi bor – «Valensiya» «Levante»ga qarshi!
Bu klublar o‘rtasidagi so‘nggi uchrashuvlar tomoshabop o‘tmoqda. Hozirda qiyin kunlarni o‘tkazayotgan «Valensiya»ning holatidan prinsipial raqibi «Levante» foydalanib qolishi hech gap emas. Shuningdek, «Vilyarreal», «Atletik» va debyutant klublarning debyuti qanday chiqishi muxlislar e'tiborida bo‘ladi.
Ispaniya La Ligasi. 1-tur
12 sentabr (shanba)
19:00. Eybar - Selta
21:30. Granada - Atletik
23:55. Kadis - Osasuna
13 sentabr (yakshanba)
17:00. Alaves - Betis
19:00. Valyadolid – Real Sosedad
21:30. Vilyarreal – Ueska
TV-translatsiya: FutbolTV
23:55. Valensiya - Levante
TV-translatsiya: FutbolTV
Qoldirilgan. Atletiko - Sevilya
Qoldirilgan. Barselona - Elche
Qoldirilgan. Real – Xetafe.
Fransiya: «Marsel» muammolar girdobidagi «PSJ»ni mag‘lub eta oladimi?
Fransiyaning amaldagi chempioni «Pari Sen-Jyermen» koronavirusdan jiddiy zarar ko‘rmoqda. Neymar, Di Mariya, Paredes, Ikardi, Navas, Markinosdan keyin Mbappe ham infeksiya yuqtirib olgani jamoaga ham o‘z ta'sirini o‘tkazmay qo‘ymayapti. Parij klubi o‘tgan turda safarda liga debyutanti «Lans»ga yutqazib qo‘ydi. Aksiga olib bu turda ham Tuxel jamoasi jiddiy qarama-qarshilikda maydonga tushadi. «PSJ» azaliy raqibi «Marsel»ni qabul qiladi. Bu bahsda ham yetakchilarning safga qaytishi so‘roq ostida. Marselliklar YeChL finalchisining hozirgi muammolaridan foydalanib qolish ilinjida bo‘lishlari aniq.
Fransiya chempionati. 3-tur
11 sentabr (juma)
Bordo – Lion 0:0
12 sentabr (shanba)
Monpele - Nitssa
Sent-Eten - Strasbur
13 sentabr (yakshanba)
Lill - Mets
Anjyer - Reyms
Dijon - Brest
Loryan - Lans
Nim - Renn
Monako - Nant
PSJ – Marsel. 23:55
RPL: TsSKA - «Spartak», Eldor Shomurodov Jasur Jaloliddinovga qarshi
Rossiya Premer-ligasi 7-turidan o‘rin olgan markaziy uchrashuv TsSKA va «Spartak» o‘rtasida kechadi. Bu safargi «Moskva derbisi»ga 14 ochko jamg‘argan «Spartak» turnir peshqadami sifatida yetib kelgan bo‘lsa, to‘rt ochko kam yiqqan TsSKA 5-o‘rinda yetib keldi. Bu o‘yin armiyachilar uchun asosiy raqiblari bilan oradagi farqni qisqartirish imkoniyatini bersa, «Spartak»ka oradagi farqni oshirish bilan birga peshqadamlikni davom ettirish uchun zarur.
Ushbu o‘yinda o‘zbekistonlik yarimhimoyachi Oston O‘runov asosiy tarkibda maydonga tushishi mumkin. Sababi bosh murabbiy Tedesko maydon markazidagi yarimhimoyachilarning jarohati sabab muammolarga ega.
Shuningdek, turning so‘nggi o‘yini - «Rostov» va «Lokomotiv» to‘qnashuvi ham o‘zbekistonlik muxlislar e'tiborida bo‘lishi aniq. Eldor Shomurodov Jasur Jaloliddinovga qarshi maydonga tushishi mumkin. Dam olish kunlardan keyin dushanba kungi bu uchrashuv ham ko‘rishga va muxlislik qilishga arzigulik o‘yin.
Rossiya Premer-ligasi. 7-tur.
12 sentabr (shanba)
15:45. Tambov – Ufa
18:30. Ural - Ximki
21:00. Axmat - Sochi
13 sentabr (yakshanba)
18:30. Dinamo - Rubin
21:00. TsSKA - Spartak
21:00. Rotor - Krasnodar
14 sentabr (dushanba)
20:30. Zenit - Arsenal
22:30. Rostov – Lokomotiv.
Usmon Ibodov tayyorladi.
