«Темир дафтар» – бу оилаларни камбағалликдан чиқаришга қаратилган «Saxovat.argos.uz» дастури. Ушбу дастурга ижтимоий аҳволи ҳамда турмуш шароити оғир бўлган, сектор раҳбарлари томонидан алоҳида назоратга олинган олинган оилалар киритиб борилади. Коронавирус пандемияси шароитида ижтимоий аҳволи ва турмуш шароити оғирлашган оилаларнинг бандлигини таъминлаш орқали уларга даромад манбаи яратишнинг «Вақтинчалик тартиби»га асосан «Темир дафтар»га киритилган эҳтиёжманд оила аъзоларига иш топиб бериш, уларнинг доимий даромадли бўлишига кўмаклашиш чоралари кўрилади.

Эҳтиёжманд оилаларга қуйидаги шаклларда ёрдам кўрсатилади:

– моддий ёрдам бериш;

– иш билан таъминлаш;

– тадбиркорликка йўналтириш.

Рўйхатга эҳтиёжманд оилаларнинг қуйидаги тоифалари киритилади:

– оиланинг меҳнатга лаёқатсиз ногиронлари ва сурункали касалликка чалинганлар;

– якка-ялғиз кексалар, бевалар ва ўзгалар қарамоғига муҳтожлар;

– 5 ва ундан ортиқ фарзанди бор оилалар;

– карантин чоралари натижасида даромад манбаини йўқотганлар;

– ҳақиқатда эҳтиёжмандлар, ночор ва моддий кўмакка муҳтожлар.

«Темир дафтар»га киритиш ва чиқариш тартиби:

Сектор раҳбарлари томонидан маҳалла фуқаролар йиғини раислари, сектор аъзолари билан биргаликда уйма-уй юриб оилаларнинг моддий ва турмуш шароитини ҳар томонлама ўрганган ҳолда сектор котиби томонидан «Saxovat.argos.uz» электрон базасига киритилади.

Сектор раҳбарларининг тавсияси ҳамда оила бошлиғининг бу тўғрисидаги ёзма мурожаати асосида туман (шаҳар) халқ депутатлари кенгаши қарори асосида «темир дафтар»дан чиқарилади.

«Темир дафтар»дан чиқариш ва уларнинг ўрнига янги оилаларни киритиш бўйича маълумотлар кунлик янгилаб борилади.

Пандемия даврида давлат томонидан ижтимоий муҳофазага муҳтож оилаларга қуйидаги ҳажмда моддий ёрдам кўрсатилиши режалаштирилган:

Республика бюджетидан (Қурбон ҳайити арафасида) – 150 млрд сўм – 150 мингта оила;

«Саховат ва кўмак» умумхалқ ҳаракати доирасида – 132 млрд сўм – 234 мингта оила;

6038-сонли президент фармонига асосан – ҳар бир жон бошига 220 сўмдан – 401 мингта оила;

«Вақф» хайрия жамоат фондидан – 150 млрд сўм.

2020 йил июль-декабрь ойларида бандликка кўмаклашиш давлат жамғармаси ва жамоат ишлари жамғармаси маблағлари ҳисобидан 192053 нафар ишсиз фуқаронинг бандлигини таъминлаш учун 433,4 млрд сўм йўналтирилиши кутилмоқда. Жумладан:

жамоат ишларига жалб қилиш орқали – 102659 нафар 231,3 млрд сўм;

қишлоқ хўжалиги кооперативларга субсидия ажратиш орқали – 19843 нафар 44,2 млрд сўм;

шахсий ва дала томорқа хўжаликларига субсидия ажратиш орқали – 28482 нафар 130 млрд сўм;

тадбиркорлик фаолиятига субсидия ажратиш орқали – 13001 нафар 11,5 млрд сўм;

28068 нафар фуқаро – 16,3 млрд сўм миқдорида ишсизлик нафақаси тайинланган.