Vazirlar Mahkamasining “Xalqlar do‘stligi” ko‘krak nishonini ta'sis etish to‘g‘risida”gi qarori loyihasi e'lon qilindi.

“Xalqlar do‘stligi” ko‘krak nishoni ta'sis etiladi.

O‘zbekiston Respublikasi Vazirlar Mahkamasi huzuridagi Millatlararo munosabatlar va xorijiy mamlakatlar bilan do‘stlik aloqalari qo‘mitasining “Xalqlar do‘stligi” ko‘krak nishonini qoida tariqasida har yili “Xalqaro do‘stlik kuni” – 30 iyul hamda “16 noyabr – Xalqaro bag‘rikenglik kuni” arafasida topshirish to‘g‘risidagi taklifi ma'qullanadi.

Belgilab qo‘yilishicha, “Xalqlar do‘stligi” ko‘krak nishoni bilan mukofotlash O‘zbekiston Respublikasi Vazirlar Mahkamasi huzuridagi Millatlararo munosabatlar va xorijiy mamlakatlar bilan do‘stlik aloqalari qo‘mitasi komissiyasining xulosasi asosida amalga oshiriladi.

Quyidagilar:

“Xalqlar do‘stligi” ko‘krak nishoni to‘g‘risidagi Nizom;

“Xalqlar do‘stligi” ko‘krak nishoni tavsifi;

“Xalqlar do‘stligi” ko‘krak nishonining guvohnomasi tavsifi tasdiqlanadi.

“Davlat belgisi” davlat unitar korxonasi O‘zbekiston Respublikasi Vazirlar Mahkamasi huzuridagi Millatlararo munosabatlar va xorijiy mamlakatlar bilan do‘stlik aloqalari qo‘mitasining buyurtmasiga muvofiq “Xalqlar do‘stligi” ko‘krak nishonlari va ularning guvohnomalari tayyorlanishini ta'minlaydi.

O‘zbekiston Respublikasi Moliya vazirligi “Xalqlar do‘stligi” ko‘krak nishonlari va ularning guvohnomalarini tayyorlash hamda mukofotlanganlarni taqdirlash bilan bog‘liq xarajatlar O‘zbekiston Respublikasi Davlat budjeti mablag‘lari hisobidan amalga oshirilishini nazarda tutadi.

“Xalqlar do‘stligi” ko‘krak nishoni to‘g‘risidagi nizomga ko‘ra, ko‘krak nishoni bilan o‘zining jonkuyarligi bilan yurtimizda yashayotgan barcha millat va elatlarning vakillari o‘rtasida millatlararo do‘stlik va totuvlik muhitini mustahkamlanishiga munosib hissa qo‘shgan, milliy madaniy markazlar va do‘stlik jamiyatlari faoliyati samaradorligini oshirish borasida fidokorona mehnat qilgan, shuningdek xorijiy mamlakatlar xalqlari bilan do‘stlik va har taraflama hamkorlikni rivojlantirishda samarali natijalarga erishgan fuqarolar taqdirlanadi.

Ko‘krak nishoni bilan O‘zbekiston Respublikasi fuqarolari, chet el fuqarolari va fuqaroligi bo‘lmagan shaxslar taqdirlanishi mumkin.

Ko‘krak nishoni va uning guvohnomasi qoida tariqasida har yili “Xalqaro do‘stlik kuni” – 30 iyul hamda “16 noyabr – Xalqaro bag‘rikenglik kuni” arafasida tantanali vaziyatda topshiriladi.

Bir shaxs ko‘krak nishoni bilan bir marta taqdirlanadi.

Ko‘krak nishoni davlat mukofotlaridan keyin ko‘krakning chap tomoniga taqiladi.