Ispaniyaning «Real» va Portugaliyaning «Portu» klubi sobiq darvozaboni Iker Kasilyas «tvitter»dagi sahifasi orqali professional futbolchilik faoliyatini yakunlashini e'lon qildi.
«O‘ylaymanki, o‘tgan yillar davomidagi futbolchilik faoliyatimga faqat havas bilan qarash mumkin», - deya yozadi Iker.
Ispaniyalik 39 yoshli darvozabonning faoliyatini yakunlashi haqida 2019 yilning dekabr oyida xabar qilingan edi. Bungacha u «Portu» safidagi mashg‘ulotlar paytida yurak xurujini boshdan kechirgandi.
Joriy yil boshida Iker Kasilyas Ispaniya futbol federatsiyasi prezidentligi uchun saylovlarda o‘z nomzodini qo‘yishini ma'lum qilgan bo‘lsa-da, yakunda bu fikridan qaytgandi. Ma'lumotlarga ko‘ra, Kasilyas tez orada «Real»ga qaytib, klub prezidenti Florentino Peresga maslahatchi sifatida ish boshlaydi.
A legendary career for Iker Casillas 👏 pic.twitter.com/DwuKckUet8
— ESPN FC (@ESPNFC) August 4, 2020
- Kasilyas futbolchilik faoliyatining asosiy qismini Madridning «Real» klubida o‘tkazgan, 2015 yilda «Portu» safiga o‘tgandi.
- Kasilyas — futbol tarixidagi eng sovrindor darvozabonlardan biri hisoblanadi. Ispaniya terma jamoasi bilan u 2010 yilgi jahon chempionatida hamda ikki marta Yevropa chempionatida (2008 va 2012 yillar) g‘olib chiqqan. «Real» tarkibida Kasilyas uch marta Chempionlar ligasi g‘olibi va 5 marta Ispaniya chempionati chempioni bo‘lgan. «Portu» bilan esa ikki bor Portugaliya chempioniga aylangan.
- Kasilyas besh marta Xalqaro futbol federatsiyasi tarixi va statistikasi versiyasi bo‘yicha jahonning eng yaxshi darvozaboni sifatida tan olingan. Bu rekord: italiyalik darvozabon Janluidji Buffonda ham shunday natija.
