«Tez yordam» loyihasining navbatdagi sonida Toshkent shahar 4-sonli tug‘ruq majmuasining homiladorlar patologiyasi bo‘limi mudiri Zarina Igamova homilador ayollarda tana haroratining ko‘tarilishi, ularda koronavirus kasalligining belgilarsiz kechishi, bunday holatda e'tibor qaratish kerak bo‘lgan jihatlar haqida aytib o‘tdi.

«Agar kasallik belgilarsiz kechadigan bo‘lsa, kuzatuvni poliklinikadagi vrach olib boradi. Agar homilador ayolda isitma ko‘tarilishi kuzatilsa, bu ayol COVID-19 bilan kasallangan yoki kasallanmagan bo‘lishidan qat'i nazar, statsionarga yuborilishi shart.

Homilador ayol 37,2 darajadagi isitma bilan yurishi mumkin degan fikr o‘rinsiz. Homilador ayollardagi 37,2 bo‘lgan isitma ham shifoxonaga yotish uchun ko‘rsatma hisoblanadi. Chunki bunda nafaqat homilador ayol, balki homila haqida ham o‘ylash kerak.

COVID-19 bilan bog‘liq yoki bog‘liq bo‘lmagan isitma sababli homiladagi o‘zgarishlar, suvining kamayib ketishi, homilada gipoksiya holatlari ham kuzatilishi mumkin. Virus onaga ozgina ta'sir qilganday bo‘lib, lekin homilaga ko‘proq ta'sir qilishi mumkin. Shuning uchun ham homilador ayol albatta vrach ko‘rigida bo‘lishi kerak.

COVID-19 tashxisi qo‘yilgan homilador ayollar yoki tug‘ib bo‘lgan, ammo tashxisi bor ayollarga hozirda Toshkent shahrida ikkita – 3 va 7-tug‘ruq muassasalari xizmat ko‘rsatyapti», – dedi shifokor.

Avvalroq shtab a'zosi. professor Anvar Alimov ma'lum qilgandiki, koronavirusning homilaga salbiy ta'siri homiladorlikning dastlabki olti oyi, ya'ni homila organlarining shakllanish davrida yuqori bo‘lishi mumkin.

Sog‘liqni saqlash vazirligi boshqarmasi boshlig‘i Barno Abdusamadova koronavirusga chalingan, yondosh kasalliklari bo‘lmagan ayollarda umuman o‘lim holatlari kuzatilmaganini ma'lum qilgan.