Toshkent shahridagi 6-sonli tug‘uruqxonada egizak chaqaloqlar vafot etdi. Sog‘liqni saqlash vazirligi xabariga ko‘ra, bunga og‘ir darajadagi chalalik va boshqa asoratlar sabab bo‘lgan. 

Qayd qilinishicha, ayol egizak homiladorlikning og‘ir asoratli kechishi tufayli 6-sonli tug‘uruq kompleksiga uch marotaba (4-11 aprel, 29 may-5 iyun va 13-17 iyun kunlari) yotqizilgan va homilaning surunkali tushish xavfi bilan davolangan. 

Ayolda homilani saqlash bo‘yicha olib borilgan statsionar va ambulator muolajalarga qaramay, 22 iyun kuni to‘rtinchi marotaba tez tibbiy yordam xizmati avtomashinasi orqali ushbu tug‘uruq muassasasiga shoshilinch ravishda keltirilgan. Unga «Homiladolik-1. Egizak. Erta tug‘uruqning boshlanishi. Homila ichki infeksiyasi. Kam suvlik» tashxisi qo‘yilgan. 

22 iyun kuni ayolda erta tug‘uruq kuzatilgan. Asoratli tug‘uruq belgilari bilan og‘ir darajadagi chalalik, chuqur asfiksiya, sust yurak urishi bilan 660 gramm og‘irlikdagi qiz jinsli chaqaloq tug‘ilgan. Shifokorlar tomonidan o‘z vaqtida olib borilgan yurak-o‘pka reanimatsiyasi muolajalari samara bermagan. 

Ikkinchi qiz jinsli o‘lik chaqaloq 15 daqiqadan so‘ng asoratli tug‘uruq belgilari bilan og‘ir darajadagi chalalik, o‘lik homilaning bachadonda ko‘ndalang joylashuvi, 560 gramm og‘irlik ko‘rsatkichlari bilan tug‘ilgan. 

Bemor qarindoshlari tomonidan imzolangan tilxatda tibbiyot xodimlariga e’tiroz yo‘qligi va patanatomik tekshiruvga qarshiligi to‘g‘risidagi qat’iy talabi tufayli o‘ta kam vaznli (660 va 560 g) chaqaloqlarni patanatomik tekshiruvdan o‘tkazish imkoni bo‘lmagan. 

Ayol 2023 yil 23 iyun kuni qoniqarli ahvolda shifoxonadan chiqarilgan.