Unga ko‘ra, vazirlik fuqarolar bandligini ta'minlash uchun bir qator liniyalarda subsidiya va dasturlarni amalga kiritgan.

«Bandlik va mehnat munosabatlari vazirligi tomonidan pandemiya davrida ishsiz va moddiy mablag‘siz qolgan aholi vakillariga shaxsiy tomorqasini rivojlantirish, mavsumga mos tarzda issiqxona tashkil qilish yoki sug‘orish vositalari o‘rnatish uchun subsidiyalar berilmoqda.

Mazkur loyiha doirasida shu paytga qadar 25 ming fuqaro ish bilan ta'minlangan.

Bundan tashqari, yangi boshlangan qishloq xo‘jaligida kooperativ harakati bo‘yicha har bir kooperativga 50 nafar ishsiz fuqaro ishga olinmoqda. Bu orqali ham hozirga qadar 15 ming nafar fuqaroni ish bilan ta'minladik.

Pandemiya davrida ish topolmayotgan yoki moddiy mablag‘siz qolgan aholi vakillariga yana bir imkoniyat: hozir tadbirkorlik boshlash uchun katta subsidiyalar ajratyapmiz.

Ishsiz o‘tirgan fuqaro tadbirkorlik bilan shug‘ullanishni istasa, unga alohida subsidiya dasturi bor. Bunda biz o‘sha fuqaroni tadbirkorlikka o‘qitish, tadbirkorligini davlat ro‘yxatidan o‘tkazish, tadbirkorlikda yuzaga keladigan turli xavf-xatarlarni sug‘urtalash pulini to‘lab berish kabi xarajatlarni zimmamizga olyapmiz.

Fuqarolar vazirligimizning internet saytidan, shuningdek, hududiy bo‘limlariga uchrashgan holda barcha ma'lumotlarni olishi va foydalanishi mumkin.

Biz shuningdek, davlat ro‘yxatidan o‘tgan ishsiz fuqaro o‘z tadbirkorligini boshlamoqchi bo‘lsa, ularga binolarning ijara pulini to‘lab berish kabi yordamlarni ham ko‘rsatmoqdamiz», – dedi Muhiddinov.

Vazir o‘rinbosarining qo‘shimcha qilishicha, pandemiya davrida aholi bandligini ta'minlash uchun Jamoat ishlari va Bandlikka ko‘maklashish jamg‘armalariga 0,5 trln 500 mln so‘m mablag‘ ajratilgan.