«200 млрд сўм ҳайит муносабати билан, 380 млрд сўм эса карантин даврида даромадсиз қолган аҳолини қўллаб-қувватлаш учун берилмоқда» – вазир ўринбосари

Жамият 18:07 / 31.07.2020 24174

«Кеча-бугун жойларда тарқатилаётган 200 млрд сўм Қурбон ҳайити муносабати билан ёрдамга муҳтож оилаларнинг ҳолидан хабар олиш учун ажратилган. «Саховат ва кўмак» жамғармаси ҳисобидан тарқатилаётган бу пуллар 150 мингта оилани қўллаб-қувватлашга қаратилган. Мазкур маблағ мутасадди идоралар томонидан шакллантирилган рўйхат асосида нақд пул шаклида тарқатилмоқда.

Бундан ташқари, президент ушбу фармони билан аъзолари 1,7 млн нафардан ортиқ бўлган 400 мингдан кўпроқ оилаларга бир марталик моддий ёрдам ажратилади ва бунинг учун 380 млрд сўм йўналтирилади. Бу маблағ карантин даврида одамларнинг тирикчилигини ўтказиши учун берилмоқда.

Биз озиқ-овқат маҳсулотларининг бир кунлик меъёридан келиб чиққан ҳолда ҳисоб-китоб қилдик. Ҳисоб-китобларимиз асосида жон бошига 14 турдаги маҳсулот учун 220 минг сўмдан тўғри келиши маълум бўлди. Бир оилада 5 киши бўладиган бўлса, 1 млн 100 минг сўмдан тўғри келади. Бу маблағниям нақд пул шаклида беришни ташкил қиламиз, чунки эҳтиёжманд оила, дейлик, томорқасида нимадир етиштираётган бўлса, биз маҳсулот шаклида олиб борган картошка-пиёзларимиз унга керак бўлмаслиги мумкин. Шунинг учун нақд пул шаклида бериладиган 1,1 млн сўмга оила учун керак бўлган мақсадлар учун ишлатади», дея Акмалхон Ортиқовнинг сўзларини келтирмоқда Kun.uz мухбири.

Аввалроқ иқтисодий тараққиёт ва камбағалликни қисқартириш вазирининг биринчи ўринбосари Қурбон ҳайити арафасида эҳтиёжманд оилаларга ажратилаётган бир марталик моддий ёрдам нима учун нақд пул шаклида берилаётганига тўхталганди.

Эслатиб ўтамиз, Қурбон ҳайити байрами муносабати билан президент фармонига мувофиқ моддий кўмакка муҳтож оилаларга республика бюджетидан бир марталик моддий ёрдам кўрсатилиши белгиланган эди.

Кўпроқ янгиликлар