1 sentyabrdan davlat organlari va hokimliklar jamoatchilik oldida elektron hisobot berish tartibi joriy etiladi

Vazirlar Mahkamasining 2020 yil 16 iyuldagi «Elektron hukumat tizimini yanada rivojlantirish, shuningdek, davlat organlari va tashkilotlarining o‘z faoliyati bo‘yicha jamoatchilik oldida elektron hisobot berishi tartibini joriy etish chora-tadbirlari to‘g‘risida»gi qarorida belgilanishicha, hisobotlar davlat tilida taqdim etilishi kerak.

Yana bir muhim jihat: hisobot jamoatchilikka tushunarli shaklda, oddiy va ravon tilda taqdim etilishi lozim hamda joylashtirilgan hisobotlardagi ma'lumotlarga ularni tasdiqlovchi tegishli hujjatlar ilova qilinishi shart.

Hukumat qarorining ilovasida ko‘rsatilgan “Davlat organlari va tashkilotlarining o‘z faoliyati yuzasidan jamoatchilik oldida elektron hisobot berishi tartibi to‘g‘risida” nizomiga muvofiq rasmiy hisobotni taqdim etish tartibi belgilangan. Hisobot mazkur nizomga ko‘ra uch bosqichda tashkil etiladi:

1-bosqich – hisobot yakunlagan kundan e'tiboran 10 kun muddatda davlat organi va tashkilotning internet jahon axborot tarmog‘idagi rasmiy veb-saytida, shuningdek, ijtimoiy tarmoqlarda, mobil messenjerlardagi rasmiy sahifalarida joylashtiradi.

2-bosqich – hisobot haqidagi xabarnoma markaziy (xududiy) bosma ommaviy axborot vositalarida va davlat organlarining va tashkilotlari rasmiy veb-saytlarida hamda ijtimoiy tarmoqlarda, mobil messejyerlardagi akkauntlarda tadbir rejalashtirilayotgan kundan kamida 10 kun oldin e'lon qilinadi.

3-bosqich – hisobot yakunlagan kundan e'tiboran 30 kun muddatda bevosita taqdim etish maqsadida rasmiy veb-saytda hamda ijtimoiy tarmoqlardagi akkauntlar orqali brifing, matbuot konferensiyalarining onlayn translatsiyalari tashkil etiladi va uning natijalari tahlil qilinadi.

Qayd etilishicha, mazkur hujjatning qabul qilinishi elektron hukumat tizimini yanada rivojlantirishga, davlat organlari va tashkilotlarining ochiqligini ta'minlashga zamin yaratishi kutilmoqda.